KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima dua bengkah penemuai basa ba Kompleks Satria Pertiwi ditu, Hari Satu.
Keterubah, iya nerima penemuai basa ari Panglima Soldadu Darat Jeneral Dato' Azhan Md Othman ti mega baru megai penuduk nya 1 Januari tu tadi.
Bela nyempulang maya nya Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah enggau Direktor Pengelikun Enggau Penerit Adat Sarawak (UKPS) Abdul Wahab Rahim.
Sama bisi datai Panglima Medan Timur Leftenan Jeneral Dato’ Mohd Sofi Md Lepi enggau Panglima 1 Divisyen Mejar Jeneral Dato’ Khairul Anuar Abd Aziz.
Nangkan nya, Datuk Patinggi Abang Zohari nerima penemuai basa ari Mandal Canselor Universiti Teknologi Sarawak (UTS) Sibu Profesor Emeritus Datuk Dr Khairuddin Ab Hamid.
Penemuai basa nya diatur nyerumba iya badu gawa ba universiti enggi perintah nya.
Bela bisi maya nya anak Premier Sarawak, Dayang Norjihan.-EDISI UKAS
