Perang Timur Tengah Dipelaba Enda Nanggul Lapan Projek Jematan Sarawak
KUCHING: Penyarut ke benung nyadi ba Timur Tengah dipelaba enda nanggul lapan iti projek jematan di Sarawak ke disadang tembu taun tu.
Sapit Premier Sarawak Datuk Amar Douglas Uggah Embas madah, Perintah Sarawak andal semua projek nya digaga enggau mujur.
"Kitai ngarap lapan iti jematan tu ulih tembu taun tu. Kitai enda nanggi bekaul pekara nya.
"Nyangka bisi penanggul mimit tang nya enda nekul pengawa ngaga projek," ku iya maya dirandau sepengudah Sarawak Infrastructure Engagement Programme 2026 ditu, Hari Dua.
Kelimpah ari nya, Datuk Amar Douglas Uggah madah, pengawa ngaga Palan Konvensyen Borneo Kuching (BCCK) 2 diatu ba renggat program meli kereban enggau chara ngulihka kereban nya.
Menteri Infrastruktur enggau Pemansang Penyangkai Kapal Sarawak nya madah, tu deka nentuka langgur projek dipejalai enggau mujur nyengkaum bekaul pekara ke tau nyadi ketegal isu global.
Iya mega madah, Perintah Sarawak enggau Perintah Besai benung matau rega kereban dikena ngaga projek lalu sida bela ngiga chara ke engkeman napi pekara nya.
Bela datai maya nya Pelajar, Inovasyen enggau Pemansang Penau Sarawak Dato Sri Roland Sagah Wee Inn, Menteri ba Opis Premier Sarawak Dato Sri John Sikie Tayai, raban Sapit Menteri Sarawak enggau Perintah Besai, Sapit Speaker Kunsil Nengeri Sarawak Dato Idris Buang, Direktor Opis Kereja Raya (JKR) Sarawak Datu Dr Cassidy Morris sereta bala bukai -EDISI UKAS
