TATAU: Komiti Tuai Raban Bansa enggau Tuai Komuniti (KMKK) Pelilih Tatau deka ngatur Pengerami Makai Lemai Mantar Gawai Dayak Renggat Pelilih Tatau 2026 kena 26 Mei tu di Dinner World Restaurant, Bintulu nyadi pelasar negap penyerakup komuniti sereta ngintu pesaka budaya raban bansa Dayak.

Pengerami nya disadang dipenyadi Menteri ba Opis Premier ti mega Kaban Kunsil Nengeri (ADUN) Kakus Dato Sri John Sikie Tayai.

Chairman Pengatur, Pemancha Gerosen Jubin madah, tuju pengerami nya diatur ukai semina ngerami Gawai Dayak aja, tang nyadi pelasar besai ngerapit kaul rayat pupu bansa di pelilih nya.

Iya madah ke pekara nya pengudah ngetuai ke Aum Komiti Pengatur ba Bilik Aum Opis Pelilih Tatau kena Hari Empat.

Berebak enggau nya, iya mega nesau mensia mayuh sama ngena peluang nya sampal datai ngerichah pengerami nya ila.

Pengatur melaba urung 1,000 pengabang datai kelai sukung ngagai pengawa negap penyerakup enggau ngelati budaya raban bansa Dayak di Pelilih Tatau.-EDISI UKAS