Borneo100 Triathlon Ngerandang Jeman Baru Dagang Temuai Lumba Sarawak
KUCHING: Sarawak majak ngentapka penuduk nyadi hab dagang temuai lumba antarabansa nengah Borneo100 Triathlon 2026 ti dikeandal meri empas signifikan ngagai ekonomi nengeri enggau komuniti menua.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, program pelanda nya deka diatur 21 Jun ila di Sematan ngayanka perintah nengeri regas ngemansangka segmen dagang temuai ari penakal batang tubuh.
Iya nyebut pekara nya ba aum media Borneo100 Triathlon 2026 ditu, Hari Empat.
Ku iya, program nya mega nyadi penyungkak ekonomi ari temuai ke bekualiti tinggi datai.
“Tu ukai semina program lumba aja, tang mega penyungkak ekonomi ti ulih nambah pemayuh temuai datai, tiimpuh diau enggau belanja,” ku iya.
Iya mega madah, penyelai menua Sematan ti ngempung elemen rampa menua asal, budaya enggau bejalai neresa menua meri kenang ti autentik ngagai penyereta enggau nyaup ngelaku Sarawak bepelasarka konsep Culture, Adventure, Nature, Food dan Festival (C.A.N.F.F).
Program nya deka ngerenchah pejalai ti mungkur nyemerai tasik ti sedandang, ngayuh ensikal nebing tasik enggau belanda ba Jalai Besai Pan Borneo.
Berebak enggau nya, iya madah, sukung Serakup Triathlon Malaysia nambah kredibiliti ngatur ba tikas nasional enggau antarabansa.
“Enti siti program nya diaku gempung besai, tu deka ngangkatka penuduk ngagai tikas tinggi agi enggau meri pengandal ngagai penyereta enggau pengatur,” terang iya.
Naka diatu, timbal tumu ba edisyen keterubah nya chukup manah ari menua tu enggau menua luar nyengkaum Singapura, Brunei, Indonesia, Jepun, China sereta sekeda menua Eropah.
Borneo100 Triathlon 2026 mega disadang meri ekonomi belimpah ngagai komuniti menua kelebih agi ba Sematan nengah sektor diau bemalam, pemakai enggau servis bukai.
Berindik ari nya, Perintah Sarawak ransing nyukung ngatur program besai empas ti ukai semina negapka industri dagang temuai, negap komuniti sereta nambah profil nengeri ba renggat global.-EDISI UKAS
