SIBU: Kerejasama mayuh agi kompeni korporat sereta Dagang Mit enggau Jelan Pemesai (PKS) ba program komuniti dikelalu negap rentayan sukung rama, kelebih agi raban ti begunaka bantu dia.

Residen Bagi Menua Sibu, Abang Mohamad Porkan Abang Budiman madah, pengawa bejalaika tanggungpengawa rama korporat (CSR) ari sektor peribit nya elemen beguna nyukung juluk perintah nengeri nengah agenda pemansang ti ngemeratka bungkur rama.

“Nengah sukung ari tuai komuniti enggau organisasyen, kitai ulih nempa komuniti Sibu ti besemekih agi enggau dijaga ari sebarang eksploitasyen,” ku iya.

Iya madah munyi nya ba Program Kaunsil Penguna Menua (MTPN) Siru: Kaul Aidilfitri begulai enggau orang kampar ba Palan Nyaga Orang Kampar (TTG) Sibu kena Hari Empat.

Nambah ke nya, Abang Mohamad Porkan meri terima kasih ngagai MTPN laban bebendar nyaga hak penguna ba nengeri tu.

Ku iya, pemujur MTPN Sibu ti udah mutar lebih 150 kompelin kenyau ari Ogos 2023, nyengkaum isu besai baka kes nipu jual beli rumah enggau servis nunjukka kreadibiliti sereta integriti organisasyen nya negi nasip rayat.

“Program sehari tu ngaul kerejasama entara MTPN, Opis Residen, pengari rayat enggau sektor peribit baka Capitol Kopi sereta NGO baka Serakup Negap Raban Indu Beserakup Sibu (PPWBS), iya nya model kolaborasyen ti chukup efektif.

“Aku ngelalau semua agensi perintah enggau gerempung ukai dikuasa perintah terus sedia berandau lalu bekerejasama enggau MTPN nentuka ekosistem nyaga penguna di Bagi Menua Sibu meruan teguh enggau responsif,” ku iya.

Nangkan nya, Kaban Kunsil Nengeri (ADUN) Bawang Assan, Dato Sri Wong Soon Koh madah, program nya nunjukka nadai siku deka dikemelu dalam ruang bilik besai komuniti.

“Nuju sida ti napi penusah, ingat mih kita enda kediri. Agi mayuh orang ti bisi penyiru lalu bisi komuniti semampai begulai enggau kita,” terang iya.

Yang Dipertua MTPN Sarawak, Lucas Lau mega ngingatka mensia mayuh semampai ibuh enggau bejimat maya ngadu genap transaksyen.

“Nyema hak nyadi penguna dikeruga, berumban minta saup MTPN. Nyeliah manah agi ari ngubat.

“Nengah sukung meruan ari semua raban, aku andal ke MTPN deka terus ngesan pangku pengawa nyadi penyaga ti teguh ngagai rayat di Sibu,” ku iya nyemetak. - EDISI UKAS