Bida Rega Diesel Sarawak & Semenanjung Malaysia Patut, Berundingka Ungkus Logistik
KUCHING: Bida rega diesel entara Sarawak enggau Semenanjung Malaysia nyadi inisiatif ti patut laban berundingka faktor geografi sereta ungkus logistik ti tinggi agi ba nengeri tu.
Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh madah, inisiatif nya endang patut berindik ari Sarawak napi pemar geografi ti besai serrta ungkus pemansang ti tinggi agi.
"Enti kitai meda, agi tubah enda nemu enggau mereti ari sukut logistik. Kebendar, taja bisi skim pemansang ungkus tang barang ditu agi mar.
"Kitai mega mayuh ngena diesel laban Sarawak tu besai lalu mayuh bepanggai ngagai entukar diesel, " ku iya.
Iya madah munyi nya lebuh dipinta ngelansa pasal rega diesel di Sabah enggau Sarawak ti murah agi dibanding Semenanjung pengudah bejadi pengawa ngelepas LCDA Sapphire Run 1.0 Begulai Enggau Komuniti, di Padang Merdeka, ditu pagi tadi.
Datuk Len nyemetak madah, bida rega nya siti inisiatif engkeman laban berundingka peminta rayat ba nengeri tu.
Sama datai, Menijar Besai LCDA, Datu Sr Zaidi Mahdi, Datuk Bandar Dewan Bandaraya Kuching Utara (DBKU) Dato Hilmy Othman, Sekretari Mendam Opis Menteri Pengeraja Asal enggau Pemansang Mengeri (MUDeNR) Datu Abdullah Julaihi, Direktor Opis Kampung Sarawak Datu Hamden Mohammad, Kontroler Kaunsil Pengeraja Asal enggau Rampa Menua Sarawak (NREB) Datu Jack Liam, Direktor Opis Tanah enggau Survei Sarawak Datu Awang Zamhari Awang Mahmood, Menijar Besai Kaunsil Pemansang Kayu Ramu Sarawak (PUSAKA), Datu Zainal Abidin Abdullah sereta Direktor DBKU Ramzi Abdillah.-EDISI UKAS
