SIBU: Pengelantang peranak menua pesisir ba Kunsil Nengeri (DUN) Ngemah terus diperati Perintah Sarawak nengah pengawa bejalaika sekeda projek infrastruktur ti dilanggur dikena nambah perengkaguna pemun, akses penyambung sereta kualiti idup komuniti menua.

Kaban Kunsil Nengeri (ADUN) Ngemah, Anyi Jana madah, projek jematan Rumah Nyaru ti meraka Sungai Bat deka digaga enda lama da.

"Pia mega, projek jalai ari Nanga Bat ngagai Nanga Perak diatu udah tembu 86 peratus bepelasarka data Opis Kereja Raya (JKR).

"Ba Nanga Jagau, Perintah Sarawak deka ngena jalai batang ti bisi diatu nyadi jalai sementara seraya nganti pengawa ngaga jalai baru ari Nanga Perak ke Nanga Jagau,” ku iya.

Iya madah munyi nya ba Pengerami Tuai Begulai Enggau Rayat enggau Bejadi Projek (MRP–PPRMS) di Rumah Sobrie Mukow, Nanga Bat Kerangan (1), Sungai Ngemah, kena Hari Enam.

Ba pekara sama, Anyi madah ke Rumah Sobrie deka dikenulu nengah Program Transformasyen Menua Pesisir (RTP).

Iya mega ngemendar agih belanja Projek Mit Pemansang Menua Pesisir (MRP) sepenyampau RM8,000 ungkup komuniti dia.

Ngenang sukut pelajar, iya muji pemujur sekula ba kandang endur nya nyengkaum Sekula Sekondari (SMK) Nanga Dap ti pas 100 peratus dalam Sijil Pelajaran Malaysia (SPM), sereta SMK Sedaya ngerikod 177 ari 178 nembiak pas peresa nya.

Nambah ke nya, Anyi nyemetak madah ke prinsip 'tuai nyadi teladan' nyadi pugu beguna nentuka pemansang menua pesisir terus dipejalai nemban agi.

Ku iya, prinsip nya seriris enggau gagasan ti kala dibantai ex- Menteri Besai, Tun Dr Mahathir Mohamad, ti ngemerat pangku pengawa tuai nyadi chunto ngagai rayat.

“Konsep ‘Tuai Nyadi Twladan' ti kala dibantai ex- Menteri Besai Tun Dr Mahathir Mohamad begunaka tuai ti nyadi chunto pemadu manah ngagai rayat.

"Pangku pengawa tu ukai semina bepanggai ba tandan bau Penghulu enggau Tuai Rumah aja, tang mega nyengkaum aku empu ti nyadi pengari rayat," ku iya.

Sama datai, bini Anyi, Gelim Utan, pengari Opis Pelilih Kanowit, Clinton Jelai, Tuai Rumah Sobrie Mukow, Penghulu Pree, bala tuai rumah enggau peranak menua. - EDISI UKAS