SIBU: Penatai pupu bansa ba sebengkah pengerami mandangka pengelantang enggau penyerakup ti majak ngerembai di Sibu.

Menteri Dagang Temuai, Seni enggau Budaya, Dato Sri Tiong King Sing madah, Pengerami Aidilfitri 2026 ti diatur di Masjid Darul Istiqamah, Jalai Sukun kena Hari Enam nyadi chunto pemadu manah lebuh peranak begempuru enggau richah sereta lantang ati.

Ku iya, pengerami ti diatur jelan nya tetap mai besai reti lebuh komuniti ari mayuh tirai juru datai begulai, bekunsi pengaga enggau semangat berami.

“Ukai semina nyendia bemacham pemakai tauka pengerichah, tang penatai rayat ari mayuh tirai juru begempuru ba siti nalan enggau tuchum sereta pengaga ti sama.

“Tu mih pengelain Malaysia, ke alai penegrami ukai enggi siti raban bansa aja, tang dikunsi begulai kelai basa, bebakih enggau begulai,” ku iya ba ruai Facebook.

Ku Kaban Kunsil Nengeri (ADUN) Dudong nya, semangat bebakih enggau begulai ba Sibu nyata diasai ke nengah pemanah kaul entara peranak.

“Di Sibu, semangat bebakih enggau begulai chukup teguh. Ari betabi, tuchum gaga nyentuk pemanah basa ti enda kala berubah,” ku iya.

Nambah ke nya, Dato Sri Tiong ti mega Kaban Parlimen Bintulu mega meri terima kasih ngagai Komiti Pengatur Masjid Darul Istiqamah laban udah ngangau ke iya begulai berami ngintu pengerami nya.

“Arap ke Aidilfitri tu terus nyadi jematan ti ngerapit semua kitai, nadai ngira sapa enggau ari ni asal kitai,” terang iya. - EDISI UKAS