SIBURAN: 15 genturung pendiau etnik mit Biannah ti begempung kenyau ari numbuhka Gerempung Biannah ba taun 2012 terus nyadi penyungkak besai negut penyerakup, pemansang enggau pengelantang komuniti.

Sapit Menteri Pengangkut Sarawak (Langit enggau Darat), Datuk Dr Jerip Susil madah, pengawa numbuh gerempung nya besai reti nyadi pelasar ngempung komuniti Biannah nyerangkung 15 genturung pendiau, lalu nentuka identiti, sejarah enggau penatai asal komuniti terus dijaga.

Ku iya, Kampung Annah Rais nyadi palan asal pemansang komuniti Biannah ti bisi sejarah besai enggau palan pengentap beumur lebih 200 taun, lalu nyadi tiang pemun komuniti ngerembai ngagai genturung bukai baka Kampung Sebakar, Kampung Sebuang, Kampung Semuti enggau Kampung Sadir.

Ngenang silik, iya ti mega Kaban Kunsil Nengeri (ADUN) Mambong ngemeratka pemesai guna pemansang berurun enggau strategik nyengkaum nyeruri infrastruktur jalai, kelebih agi jalai Tebedu–Semuti–Sadir ti disadang ngerandang akses besai agi ngagai pemansang ekonomi enggau rama peranak menua pesisir.

Dikena negap sektor dagang temuai, perintah mega ngagihka belanja urung RM8 juta ungkup pemansang produk dagang temuai di Kampung Annah Rais.

Inisiatif nya mega nyerangkung pemansang tebing ai, ngatur program dagang temuai komuniti, ngaga amfiteater sereta nyendia rumah pemandang budaya.

“Pemansang dagang temuai bepelasarka budaya tu ukai semina nyungkak ekonomi Kampung Annah Rais, tang mega meri pemaik ngagai genturung pendiau besemak nengah empas rentayan nya,” ku iya ba Pengerami Makai Lemai Gerempung Biannah 2026, ditu kena Hari Enam.

Nangkan nya, Sapit Chairman Gerempung Biannah, Simbas Mair madah, gerempung nya ditumbuh dikena ngempung komuniti, negap atur sereta nyaga pengelantang kaban nyengkaum bantu penusah ngenyit, penusah rabat enggau sukung pelajar.

Iya nerang ke pengawa ngatur pengerami makai lemai nya ukai semina ngumpul belanja, tang mega dikena ngerapit kaul sereta negap rentayan komuniti entara komuniti Biannah.

Kenyau ari ditumbuh, gerempung nya udah ngagihka mayuh bantu nyengkaum belanja ngintu pengelantang, sukung pelajar sereta bejalaika inisiatif pemansang komuniti ti meri pemaik ngagai peranak ba 15 genturung pendiau nya.

Bela datai, Pegawai Tadbir Menguasa Opis Pelilih Mit Padawan Julius Scott Sapong enggau Pemancha Bidayuh Pelilih Kuching Raymond Jihap. - EDISI UKAS