KUCHING: Gaya hari angat diatu begunaka semua raban bejaga berindik ari risiko penusah angus nambah sereta kualiti angin majak kamah.

Dewan Bandaraya Kuching Utara (DBKU) ba sebengkah penerang kena Hari Minggu madah, penusah babas angus pemesai urung tiga hektar ba Jalai Sultan Tengah semak Begunan Sumber Alam, Petra Jaya, tengah hari kemari ngingatka kitai pasal empas aktiviti nunu babas sepeneka ati.

Berebak enggau nya, mensia mayuh dilalau anang ngereja sebarang pengawa nunu babas ungkup tuju meresi tauka muai utas, tang ngena chara ti likun agi nyengkaum servis ngumpul uras ti disediaka DBKU.

Mensia mayuh mega dipinta semampai berati ke kandang endur ngelingi sida kelebih agi endur ti mudah angus baka padang rumput enggau babas, ngurangka aktiviti luar maya gaya hari kelalu angat sereta berumban ngeripot sebarang penusah angus ngagai raban bekuasa.

DBKU mega madah ke pengawa matau enggau neritka atur deka terus dipejalai lalu atur deka diterit ngagai sida ti ngelanggar atur nengah Seksyen 113 Ordinan Pihak Berkuasa Tempatan 1996.

Nya alai, pengawa tu beguna amat nentuka pengelikun komuniti semampai dijaga sereta pemeruan rampa menua ba mengeri enda dikeruga. - EDISI UKAS