MERADONG: Pemansang menua pesisir ba Kunsil Nengeri (DUN) Daro disungkak enggau belanja RM81.3 juta.

Kaban Kunsil Nengeri (ADUN) Daro Dr. Safiee Ahmad madah, sekeda ari batang projek iya nya Bekal Karan Menua Pesisir (BELB) di Sungai Mawan datai di Kampung Sawai beungkus RM21 juta, di Batang Lassa, Matu (RM7.7 juta) enggau di Sungai Passin (RM6 juta).

"Kelimpah ari nya, pemansang multimedia baka sambung Wi-Fi ditu bela diperatika," ku iya maya Pengerami Ramah Tamah Hari Raya Aidilfitri Taun 2026 di Kampung Muara Lebaan ditu, Hari Minggu.

Maya nya iya mega minta rayat mayuh semampai meri sukung sereta kerejasama enggau perintah dikena nentuka semua langgur pemansang ulih digaga enggau mujur lalu diasaika semua.

Ku iya, Perintah Sarawak semampai chakah ngemansangka menua pesisir ketegal ngira pengelantang rayat.

Kelimpah ari nya, iya madahka pemesai reti kerejasama enggau agensi perintah dikena ngenegapka agi sektor betanam betupi dikena nambah penatai pemisi rayat.

Awak nya bela dikena iya nyuaka geran khas RM10,000 ngagai Komiti Pemansang enggau Pengelikun Genturung Pendiau (JKKK) Kampung Muara Lebaan enggau RM5,000 ungkup Surau Darul Abidin.

RTP Taun 2026 sepenyampau RM150,000 bela diungkup dikena ngaduka jalai di menua nya. -EDISI UKAS