KUCHING: Penumbuh Raban Khas OPS TIRIS 4.0 di Sabah, Wilayah Persekutuan Labuan enggau Sarawak deka nyaup perintah napi pengawa salah ngena subsidi kelimpah matau rega barang lebih agi minyak.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, rega minyak niki maya tu ketegal ungkus minyak ke besai ti bela marit rega barang ke bukai.
"Pekara tu meseti diperatika perintah nengah unit penerit adat dikena nyeliah orang ti beambi ulih sepeneka nikika rega," ku iya.
Iya bejaku munyi nya ba aum media 'Teresa Teng 31st Memorial Tribute Concert 2026' ditu, Hari Dua.
Iya mega madah, pemutus Perintah Besai ngempuru mayuh agensi penerit adat nyengkaum soldadu enggau polis ba OPS TIRIS 4.0 endang patut dikena ngenegapka agi pengawa nerit adat lebih agi semak entara menua.
Ku iya, bida rega barang enggau minyak Malaysia enggau menua sepiak tau bendar ngasuh pengawa mai belalai nyadi.
"Enti pengawa nyaga ba entara menua enda dipejalaika enggau manah, penyalah mai belalai barang subsidi tau nyadi lalu tu ngujungka bekal barang ba menua kitai dikeruga nyentuk ngenataika penanggul ngagai perintah nyaup rayat," pia ku iya madah baru.
Berebak enggau nya, Dato Sri Abdul Karim madah, inisiatif perintah nyungkak pengawa matau enggau nerit adat nengah OPS TIRIS 4.0 ngelai chara proaktif nentuka subsidi enggau pengawa nyaga barang ulih mai pemaik ngagai rayat. -EDISI UKAS
