BRUIT: Macham bengkah projek pemansang beungkus lebih RM11.6 juta dilanggur enggau benung digaga di kampung Bruit.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pemansang nya bepun ari pengeransing perintah deka ngangkat tikas pengidup rayat menua pesisir.

Iya ke mega Kaban Kunsil Nengeri (ADUN) Semop madah, sekeda ari projek nya baka baka Proposed Rehabilitation Of Drainage And Irrigation Infrastructure Of Tg. Sirik Scheme (Block C), Bruit, Pulau Bruit ke beungkus RM10.5 juta ke diatu agi nganti pemendar digaga.

"Kelimpah ari nya, projek ngaduka jalai ba Kampung Sesco No.2 beungkus RM390,000 ke diatu benung digaga lalu disadang tembu enda lama agi," ku iya.

Iya nerangka pekara nya maya Pengerami Ramah Tamah Aidilfitri 2026 ADUN N.42 Semop enggau Parlimen P.206 Tanjung Manis, Hari Dua tu tadi.

Iya mega madah, projek ngaduka jematan besai ba jalai penama beungkus RM458,640 bela benung digaga lalu projek ngemanahka jalai penama Kampung Bruit beungkus RM350,000 diatu ba renggat ngabas taba.

"Semua projek tu besai amat reti ngagai rayat ditu. Bisi genturung pendiau mayuh sungai ke patut digagaka kitai jematan enggau jalai," ku iya madah baru.

Kelimpah ari nya, Datuk Abdullah ngena awak nya meri pengaga ati ngagai nembiak ke mujur ba pelajar.

"Nembiak ke mujur nampung pelajar ngagai universiti kitai bisi nyendiaka inisiatif bantu RM1,200 kelimpah RM500 agi diberi ungkup nembiak ke bulih pemutus 5A ke atas," pia ku iya.

Nangkan nya, Kaban Parlimen Tanjung Manis, Dato Ir Yusuf Wahab bela nyukung pengawa numbuhka pemansang di menua nya lalu madahka iya semampai betatika peminta enggau guna rayat dia.

Iya madahka projek nya tau bendar nyungkakka agi ekonomi lebih agi bekaul pengawa berikan enggau produk pemakai di menua nya.-EDISI UKAS