SEMOP: Pengawa betemu enggau rayat di menua ke mungkur 19 bengkah endur ba pengelama lapan hari udah mulaika asil alai Kampung Tekajong nerima pemansang manggai RM13.245 juta.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, ari pengawa nya, penemu enggau peminta rayat ulih ditemu enggau nyemetak agi.

"Nengah pengawa tu, kitai ulih meda kediri empu nama ke patut diberi ngagai rayat lalu ngiga chara dikena mutar isu ke bisi nyadi ngambika pemansang digaga enggau engkeman sereta inklusif," ku iya.

Iya bejaku munyi nya maya Pengerami Ramah Tamah Aidilfitri 2026 di Kampung Tekajong ditu, Hari Dua tu tadi.

Kaban Kunsil Nengeri (ADUN) Semop nya bela madah, projek besai ke dilanggur iya nya sistem parit enggau entali ai ba Skim Tanjung Sirik ke beungkus urung RM11.5 juta ke diatu benung nganti dikemendarka digaga.

"Beberapa iti projek bukai udah tembu baka ngaduka jematan beungkus RM405,000, projek ngadu jalai renggat keterubah (RM550,000) enggau renggat kedua ba Jalai Merdeka beungkus RM500,000.

"Projek ngadu Balai Serebaguna Kampung Tekajong mega deka digaga enggau belanja urung RM250,000 kelimpah projek ngaga palan engkah kereta beungkus RM40,000 udah tembu.

"Semua tu mandangka pengeransing perintah numbuhka pemansang ungkup pengelantang rayat," ku iya madah baru.

Pengerami ke diatur Palan Servis DUN Semop enggau Parlimen Tanjung Manis maya nya bela digulu Kaban Parlimen Tanjung Manis, Dato Ir. Yusuf Abdul Wahab.-EDISI UKAS