MIRI: Pelajar enggau Latih Teknikal enggau Vokasional (TVET) majak negap penuduk nyadi penyungkak pemansang ekonomi nengeri ari nyendiaka pengereja landik ti nangkup peminta industri maya diatu.
Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin madah, pemansang ukai semina bepanggai ba penemu aja, tang ditempa ari pengereja landik enggau pemintar runding.
“Pemansang ukai semina bepanggai ba penemu, tang ditengkebang jari ti landik enggau runding ti pintar. Nya alai, TVET nyadi penyungkak ti nyukung mayuh sektor nyengkaum infrastruktur, dagang temuai, teknologi digital sereta dagang mit enggau jelan pemesai,” ku iya.
Iya nyebut jaku nya lebuh bejadi Pengerami Konvokesyen Palan Diaku Almacrest Global Skills Centre (AGSC) Miri ungkup taun 2026 ditu, Hari Lima.
Ba pengerami nya, bisi 58 graduet dirami, mandangka pemujur TVET majak gah nempa pengereja landik di Sarawak.
Iya mega madah, Sarawak semampai ransing negap pemansang modal mensia nengah pengawa meranak puku ba pelajar lalu nempa rebak biak ti landik, inovatif enggau ulih besemekih ba tikas global.
Ngenang pasal Pelajar Tumu Nembiak Mit, iya madah ke pangku pengawa pengajar endang signifikan ti nempa pemansang kognitif, pengasai ati enggau ulah nembiak mit ti menuku.
“Enti pengajar tumu nembiak mit dipatih manah, tu deka meri rampa pelajar ti likun enggau lantang, lalu ulih nempa mensia ti bisi pengandal enggau ulih besemekih jemah,” ku iya.
Seraya Menijar Palan Diaku AGSC Miri, Sterwina Kho Wan Ling madah, konvokesyen nyadi kenang manis ti ngerami pemujur empat kohort keterubah Program Pendidikan Awal Kanak-Kanak Sijil Kemahiran Malaysia (SKM) Tahap 3.
Ku iya, AGSC Miri ransing meri latih pengelandik bisi kualiti sereta nempa pengajar tumu nembiak mit ti kompeten enggau ransing gawa ke pemansang komuniti.
“Graduet ti dirami sehari tu ukai semina pemujur, tang ngerandang pengawa nempa pengajar ti ulih nyeridi rebak menyana dudi hari,” ku iya.
Konvokesyen keterubah diatur nya ukai semina ngerami akademik aja, tang lambang pengepun singkang graduet gawa ke pemansang komuniti, kelebih agi ba pengawa pelajar tumu nembiak mi tba nengeri tu.
Pengerami nya mega digulu pengari Sapit Menteri Dagang Temuai, Industri Kreatif enggau Seni Pemerindang (Dagang Temuai), Kr. Kelvin Chia Kah Leong, bala pemesai kanan AGSC sereta apai indai graduet.- EDISI UKAS
