SSWF Disungkak, Portfolio Meranak Puku Dudi Hari Ditambah
KUCHING: Sarawak Sovereign Wealth Future Fund (SSWF) disadang majak mansang nengah pengawa nambah portfolio meranak puku seriris enggau pelin timpuh panjai.
Sapit Premier Sarawak, Datuk Amar Awang Tengah Ali Hasan madah, SSWF udah mandangka asil manah sepengudah ngalih ngagai renggat meranak puku ba taun 2025.
Ku iya, pengawa nya mungkur renggat domestik enggau global.
"Tu bela sebagi ari pengeransing numbuh komuniti meranak puku global nyengkaum ngambi bagi ba forum antarabansa ti mandangka juluk ati deka nyadi institusyen wang ke diaku ba renggat dunya," ku iya madah.
Iya bejaku munyi nya ba Pengerami Hari Raya SSWFFB ke dirichah enggau penatai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ba Kunsil Nengeri (DUN) Sarawak, Hari Tiga.
Iya mega madah, pemujur SSWF ukai semina bepanggai ba siku aja tang bepun ari pemanah kerejasama semua nyengkaum agensi perintah, bakih strategik, penyanding penemu sereta sida ke bekaul.
Iya ngarap SSWF semampai ulih nyaup sereta nyukung juluk ati pemansang Sarawak ti bela ngembing pengelantang dudi hari.
Bela datai maya nya Sapit Premier Sarawak, Datuk Amar Prof Dr Sim Kui Hian, Speaker DUN Sarawak, Tan Sri Datuk Amar Mohamad Asfia Awang Nassar, Menteri ba Opis Premier Sarawak, Dato Sri John Sikie Tayai sereta bala bukai.-EDISI UKAS
