Premier Sarawak Nerima Penemuai Basa TAM Pampang Sarawak
KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg bisi nerima penemuai basa ari Serakup Teknologi Malaysia (TAM) Pampang Sarawak, di Kompleks Satria Pertiwi, ditu, Hari Empat.
Deligit nya betuai ke Chairman TAM ti mega Direktor Opis Kereja Raya (JKR) Sarawak, Datu Profesor Dr Ir Cassidy Morris.
Nitih penerang media TAM Pampang Sarawak, tuju penemuai nya ngelangkar inisiatif besai empas enggau Perintah Sarawak nuju ekosistem teknologi tegap sereta pemansang modal mensia landik di nengeri tu.
“Batang randau nyelinting pengulih pengawa begulai ti rat agi enggau agensi pemansang penau nengeri, nyengkaum ‘Sarawak Skills and Talent Development’ (STACK), dikena nyukung agenda nempa mayuh agi profesional teknologi sereta nambah penau teknikal Sarawak nipak juluk ekonomi bepuguka inovasyen,” ku penerang nya.
Kerejasama nya mega ngerandang mayuh agi kaul pemekuh industri, institusi akademik enggau komuniti profesional ngambi sama bekunsi penemu pakar enggau ngemayuh penemu ba bidang teknologi.
Chara gawa begulai tu diperati ulih nyungkakka agi pemansang ekosistem teknologi ti dinamik enggau ulih besemekih ba tikas global.
Nipak pangku pengawa Datuk Patinggi Abang Zohari nyadi Penyanding Penemu TAM Pampang Sarawak, serakup nya chukup andal ke kaul kerejasama enggau agensi perintah, industri enggau institusyen pelajar deka terus ditegap nengah bemacham program teknologi, pekit profesional sereta inisiatif bekunsi penemu ti diatur ti meri pemaik terus ngagai komuniti teknologi nengeri.
Sida mega madah kediri deka ransing agi nampung kerejasama rat enggau semua raban dikena nyungkak pemansang teknologi, negap rentayan profesional sereta merangsang inovasyen nentuka Sarawak terus nyadi pengemudi pemansang teknologi di rantau tu. -EDISI UKAS
