SRI AMAN: Inisiatif nyungkak sektor betanam betupi Sarawak majak disungkak lebuh projek pemansang betanam betupi manggai RM6.9 juta diberi ngagai lima penerima ba menua Batang Lupar, lalu nya nyadi penyungkak produktiviti sereta bekenaka teknologi moden ba peranak menua.

Agih belanja nya udah disua serimbai Pengawa Bejadi Program Gelumbang Padi Sarawak: Smart Sarawak Bedandang (SMART SBB) enggau Hari Ngundang Penguna Pemansang Betanam Betupi Begulai (IADA) Batang Lupar 2026 di Dewan Nangkai, Stumbin, Hari Empat.

Lima penerima iya nya James Batang Lang ti nerima RM1.53 juta, Mancha Uchang (RM3 juta) enggau Waine Jaya (RM300,000).

Seraya Sapawi Mentahir nerima bantu RM1.3 juta lalu Alfred Renang nerima RM800,000.

Bantu diberi nya mungkur pengawa nyendiaka input betanam betupi, meli kereban, berumpang umai, nyeruri jalai kebun sereta ngintu sistem parit enggau entali ai.

Inisiatif nya diperati nyadi pengawa strategik nyungkak aktiviti bumai padi ti sistematik agi enggau ngena teknologi, nipak pengawa nambah asil padi enggau nyamin bekal pemakai menua.

Sama datai, Menteri Betanam Betupi enggau Jamin Bekal Pemakai, Datuk Seri Mohamad Sabu, Kaban Kunsil Nengeri (ADUN) Bukit Begunan Datuk Mong Dagang, ADUN Lingga Dayang Noorazah Awang Sohor, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan Ikom enggau Sapit Tuai Sekretari (Pemansang) Opis Menteri Betanam Betupi enggau Jamin Bekal Pemakai, Dato Luqman Ahmad, . -EDISI UKAS