LIMBANG: Sepenyampau 110 orang gawa perintah dirami ba Pengawa Nyua Pingat Perkhidmatan Setia ditu, Hari Lima.

Pengawa nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Pengawa sekali tu kedua kali diatur taun 2026, ngaul penerima ari 13 opis enggau agensi, mungkur semilan opis perintah nengeri enggau empat agensi Perintah Besai.

Ngenuluka rintai penerima iya nya Residen Bagi Menua Limbang, Unus Tambi ti udah ransing enggau taluk gawa pengelama 33 taun.

Bela dirami Kalthom Ahmad ari Opis Imigresen Malaysia Nengeri Sarawak ti nurai rikod gawa pengelama 37 taun.

Penerima bukai ungkup timpuh gawa 33 taun nyengkaum Maria Cotilla Louise @ Rozita Kulai ari Opis Residen Bagi Menua Limbang, Christina Joannes Antas ari Opis Kereja Raya Sarawak sereta Ahad Tusin ari Opis Servis Veterinar Sarawak.

Dua da penerima ari Opis Pengerai Nengeri Sarawak, Roslan Abu Samah enggau Lollyta Simun, sama nerima basa pengudah 33 taun gawa.

Pengawa nya mandangka perintah ngenang pemanah pengawa enggau penaluk orang gawa perintah bejalaika servis pemadu manah ngagai rayat sereta nyungkak pemansang nengeri.

Dulu ari nya, Premier Sarawak udah sembiang Jumaat di Masjid Jannatul Firdaus lebuh datai ari Padang Bilun Terbang Limbang sebedau ngulu pengawa nya.

Sama datai, Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikasyen Sarawak, Dato’ Sri Julaihi Narawi, Sekretari Perintah Sarawak, Datuk Amar Mohamad Abu Bakar Marzuki enggau Direktor Unit Pengatur enggau Pemansang Pengereja Pengawa, Datu Sharifah Rohana Datu Wan Alwi.-EDISI UKAS