LIMBANG: Perintah Sarawak chakah bejalaika inisiatif nurun gawa dikena ngedut takah pemansang enggau nentuka serap rayat, kelebih agi ba menua ulu, nerima akses terus ngagai servis perintah.

Nengah Program Sarawakku Sayang, perintah nengeri majak negap pengawa ngundang rayat nentuka nadai raban dikelaung ari pemansang.

Sekretari Perintah Sarawak, Datuk Amar Mohamad Abu Bakar Marzuki madah, Program Sarawakku Sayang nyadi chara proaktif perintah ngundang rayat, kelimpah nambah penerang enggau servis perintah.

Ku iya, program nya meri peluang ngagai rayat ngulihka penerang enggau servis terus ari agensi perintah ti semak.

“Tuju Program Sarawakku Sayang meri penerang bekaul servis perintah ngagai rayat ngambi sida ulih ngelawa endur nya ngulihka servis betunga mua tauka ‘human touch’,” ku iya lebuh dirandau media pengudah Pengawa Mantar Ngelanchar Program Sarawakku Sayang 2026, Hari Lima.

Ku iya, taja servis digital majak ngerembai, tang chara betunga mua agi beguna nentuka utai diguna rayat ulih ditangkup.

“Taja servis nengah tali arus bisi, tang rayat ti datai batang tubuh ngasuh servis engkeman agi,” ku iya.

Iya mega madah, pengawa nya mega narak semangat talukka Sarawak ba rayat, nyengkaum ba penyerakup, pengelantang enggau penegap nengeri.

Iya madah baru, Limbang bisi pengulih besai dikemansang nyadi menua ulih besemekih, nyengkaum pengelebih ari pengelain budaya, pemakai enggau pemansang ti benung dipejalai.

Iya mega madah, Program Sarawakku Sayang dikeandal ulih nyadi penyungkak mayuh agi inisiatif baka nya dipejalai ba menua bukai, lalu ngerembai pemaik ngagai rayat ba selampur nengeri.

Program nya mega disadang meri empas besai ti nambah penemu rayat ba mayuh inisiatif perintah, kelimpah rayat nyamai akses ngagai servis enggau nyempil kaul entara agensi perintah enggau komuniti menua.- EDISI UKAS