TYT Sarawak & Bini Nerima Penemuai Basa Konsul Jeneral China Di Kuching
KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi nerima penemuai basa Konsul Jeneral Republik Rakyat China di Kuching, Xing Weiping di Astana Negeri Sarawak, kena Hari Satu.
Tuju penemuai basa nya bekelala enggau Xing Weiping nyadi Konsul Jeneral Republik Rakyat China di Kuching kelimpah negutka kaul dua menua ti udah ditanggam entara Sarawak enggau China.
Ba penemuai nya, kededua raban sama besilih penemu bekaul mayuh bidang strategik nyengkaum ekonomi digital, kuasa ulih dikena baru, 'artificial intelligence' (AI), ekonomi gadung sereta pemansang sektor betanam betupi.
Xing Weiping mega madah kediri temegah ati meda peneras pemansang, penegap politik enggau pengelantang rayat pupu bansa di Sarawak, lalu madah ke China ransing terus nyadi bakih pemansang ti signifikan nyukung juluk Sarawak nyapai status nengeri mansang manggai 2030.
Tun Pehin Sri Dr Wan Junaidi mega bekunsi peneleba gawa ba renggat Perintah Besai, nyengkaum sekeda penemuai gawa ke China ti ngaul transformasyen pemansang deras menua kenyau ari taun 1990-an, kelimpah ngenang sejarah kaul diplomatik enggau dagang entara Malaysia enggau China ti udah lama ditanggam kenyau jeman Menteri Besai kedua, Niang Tun Abdul Razak Hussein.
Sama datai, Direktor Opis Kandang Menua Sarawak, Opis Menteri Luar Malaysia Dato Fenny Nuli, Mandal Konsul Jeneral Chong Changhong, Sekretari Keterubah Yu Xing, Sekretari Kedua, Zeng Haoyao sereta Sekretari Ketiga Zhang Wan. -EDISI UKAS
