KUCHING: Unit Komunikasi Awam Sarawak (UKAS) enggau Perbadanan Ekonomi Digital Malaysia (MDEC) deka nempa kaul strategik sereta besaup ngemujur Borneo Animation & Games Festival 2026 ke deka diatur 19 ngagai 23 Ogos 2026.

Pekara nya dirandau maya MDEC betuaika Manijer Kanan (Sarawak enggau Sabah) Opis Ekonomi Digital Negeri, Awang Safri Awang Ahmad ngatur penemuai basa ngagai UKAS ditu, Hari Tiga.

Penatai sida disambut Direktor UKAS Awang Putrayusrie Awang Redzuan.

Maya nya, MDEC bekunsika penerang bekaul pengawa sida ke nyadi agensi ba Opis Menteri Digital Malaysia ti ngembing transformasyen ekonomi digital menua nyengkaum ngemansangka ekosistem animasyen, main digital, konten kreatif sereta ngemansang pengelandik.

Batang pekara ke bisi dirandau iya nya kerejasama enggau UKAS ti nyaup nyadung penerang bekaul Borneo Animation & Games Festival 2026 ke ngempuru pemain industri, pengemeran kreatif, pemeranak puku sereta pengelandik biak ba bidang animasyen enggau main digital ari dalam enggau luar menua.

Program nya disadang deka dilanchar Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti dilanggur disempulang enggau macham program bukai baka program pemandang, penerang, mandangka projek, program pemandang kereja enggau wayang. -EDISI UKAS