KUCHING: Itali bisi ati deka nyerungkai pengulih nempa kerejasama strategik enggau Sarawak lebih agi ba sektor kuasa enggau aeorangkasa.

Duta Besai Itali ke Malaysia Rafaelle Langelle madah, beberapa delegit dagang ari menua sida udah dilanggur deka dibai ke Sarawak enda lama agi ngambika ulih meda kediri awak meranakka puku ba nengeri tu.

Ku iya, tu lebih agi bekaul enggau sektor kuasa ke mungkur infrastruktur enggau teknologi ngasilka produk kuasa nyengkaum kuasa ulih dikena baru.

"Kami tekait ati enggau grid ASEAN enggau semua projek ke bekaul enggau projek besai ASEAN tu.

"Kami mega endang chakah ngemansangka biofuel ti bela udah dikemeranka Perintah Sarawak. Tu majak nyadi kereban ke beguna, enti nitihka gaya dagang kuasa global," ku iya.

Iya bejaku munyi nya maya aum media sepengudah ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Tiga.

Kelimpah ari nya, iya mega madah ke pengulih nempa kerejasama ba sektor aeroangkasa ke endang bisi sejarah di Itali.

Ku iya, mayuh orang enda nemu Itali nyadi menua ketiga di dunya ngelancharka satelit ke angkasa urung 70 ngagai 80 taun suba sepengudah Amerika Syarikat enggau USSR (diatu Russia).

"Udah nya kami endang chakah ngaduka pengawa bekaul sektor nya kelimpah udah bisi industri aeroangkasa ke entap ti mega matak pengerindu Perintah Sarawak.

"Nya alai, kitai ulih bekerejasama ba sektor tu," pia ku iya.-EDISI UKAS

Pemberita: Ahmad Daniel Faiz
Gambar: Shahril Haqim