KUCHING: Penyakit rabies di Sarawak mengkang ngirauka ati alai 93 kes dirikodka nyadi enggau 86 iti nabanka nyawa kenyau ari taun 2017.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, rikod nya mandangka penyakit tu tau bendar nabanka nyawa enti enda diputar enggau lengkas.
"Penanggul diatu iya nya agi mayuh enda nemu rabies tu siti penyakit ke enda ulih gerai.
"Reti iya, enti udah diketup meseti berubat enggau lengkas lebih agi anak mit," ku iya madah.
Iya nerang pekara nya maya dirandau media ba Program Vaksinasi Oral Rabies (ORV) di Taman Malihah ditu, Hari Tiga.
Ba pekara bekaul, ku iya, Sarawak udah ngerikod tiga kes nabanka nyawa naka taun tu, ke nyadi ba Taman Malihah, Serian enggau Samarahan.
Dikena mutarka penyakit nya, iya madah, perintah nengeri ransing ngatur chara baru iya nya ORV ti lebih agi dikena mutar pemayuh uduk ke nadai orang ngempu.
Naka ke diatu, nyauka 700 iku uduk udah diambi nengah pengawa vaksinasyen nya kelimpah tuchuk vaksin ke diatu betandu di selampur nengeri.
Taja pia, penanggul ke nyadi iya nya pemayuh jelu nadai orang ngempu enggau gaya entara menua ke muntang alai tama ngujungka pengawa mutar penyakit nya enda mudah digaga.
"Sida ke diau ditu nyengkaum sida ke beempu uduk bisi lisin tauka nadai endang meri kerejasama ke manah.
"Tang pekara ke patut lebih agi digaga kitai iya nya penemu bekaul pengelikun diri lebih agi penemu senentang nama patut digaga enti udah diketup ukui," ku iya madah baru.
Bela datai maya nya Direktor Opis Servis Veterinar Sarawak (DVS) Datu Dr Adrian Susin Ambud enggau Presiden ‘Sarawak Society for the Prevention of Cruelty to Animals’ (SSPCA) Datin Sri Dona Drury Wee. -EDISI UKAS
