KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar nerima penemuai basa Chairman FELDA, Datuk Seri Ahmad Shabery Cheek di Astana Negeri Sarawak ditu, kena Hari Satu.
Tuju penemuai nya berandauka pangku pengawa FELDA nyukung penegap ekonomi raban pekebun, kelebih agi ba pemansang kandang menua Sarawak.
Ba randau diatur nyau deka sejam nya, Datuk Seri Ahmad Shabery mega meri terima kasih ke pemanah Tun Pehin Sri Dr Wan Junaidi ti ransing bejalaika pangku pengawa enggau ngetanka pengelantang rayat pupu bansa di Sarawak.
Iya mega madah kediri temegah ati meda pemansang Sarawak ba bidang ekonomi gadung dan ekonomi digital ti diatu nyadi chunto ba renggat nasional.
Ba randau ke sama, Datuk Seri Ahmad Shabery mega bekunsi penerang senentang program pemadu baru FELDA ti dilangkar dikena nambahka tikas pengidup rayat, senutuk enggau juluk ati Sarawak nyapai status nengeri mansang.
Tun Pehin Sri Dr Wan Junaidi ngarap ke kerejasama entara agensi Perintah Besai enggau Perintah Sarawak deka majak ditegap ba pengawa nyungkak agenda pemansang nengeri. -EDISI UKAS
