BINTULU: Projek ngaga jalai begembar ari Jepak ke Padang Bilun Bintulu disadang ulih tembu tumu ari taga asal.

Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo madah, projek ti ditaga tembu Oktober 2027 nya bisi nunjukka pejalai ti chukup manah naka diatu.

Ku iya, ari pejalai projek enggau skop kereja ba rentayan pandak urung 4.1 kilometer, kontraktor disadang ulih ngaga projek tembu tumu agi.

“Enti tembu ila, takah pejalai ari tengah mengeri Bintulu ke padang bilun deka pandak agi kurang ari lapan kilometer dibanding urung 25 kilometer sebedau tu.

“Tu deka ngasuh pejalai semina urung 10 minit dibanding nyau deka 30 minit diatu,” ku iya lebuh dirandau media ba pejalai gawa ngabas taba projek jalai begembar ke Padang Bilun Bintulu, kena Hari Satu.

Iya mega madah ke pengawa ngambi tanah ti sebedau tu nyadi penekul udah mujur diputar asil kerejasama pengari rayat, Opis Kereja Raya (JKR) sereta Opis Tanah enggau Survei.

“Ari isu tanah udah teputar, kontraktor diatu ulih ngena taba enggau lanchar agi sereta kereja digaga nitih taga,” ku iya.

Ngenang projek bukai, ku iya, projek ngaga Palan Opis Begulai (IAC) Bintulu diatu nyau deka tembu ari sukut fizikal.

Ku iya, taga projek tembu ditetapka Jun tu, bepanggai ba pengawa nganjung kereban ramu ke taba.

“Pengudah tembu fizikal, agensi perintah begunaka awak besikap sebedau pindah ke opis baru.

“IAC Bintulu deka nyadi entara begunan ikonik ba menua Jepak sereta negapka sistem bejalaika servis perintah,” terang iya.

Iya mega madah, projek jalai begembar enggau IAC nya sebagi ari pemansang beguna ti deka meri empas besai ngagai menua Jepak enggau Bintulu mega.

Sama datai, Kaban Kunsil Nengeri (ADUN) Jepak, Iskandar Turkee.-EDISI UKAS