KOTA SAMARAHAN: Perintah Besai majak mandangka pengeran nambahka infrastruktur ai enggau kuasa di Sarawak nengah bemacham projek strategik beungkus manggai RM2.6 bilion ti deka nyamin bekal enggau pengelantang rayat.

Sapit Menteri Besai ti mega Menteri Idar Kuasa enggau Transformasyen Ai, Datuk Amar Fadillah Yusof madah, Program Squad PETRA diatur pengelama dua hari ti berengkah di Batang Ai endang bekaul sektor kuasa enggau bekal ai.

Ku iya, program nya bekaul pemansang kuasa nyengkaum hidroelektrik enggau solar melepung sebedau nguing ngagai bekal ai.

“Pejalai sehari tu bekaul pengawa nambahka jamin bekal ai beresi, nyengkaum projek pam di Kampung Sungai Lumut ngambi ai deras agi sereta nentuka bekal diatur efisien agi ungkup peranak menua,” ku iya ba aum media ditu, Hari Satu.

Iya nerang, projek nya mega mungkur pengawa ngurangka Non-Revenue Water (NRW) ari nganti paip lama sereta ngemanahka sistem magi bekal ai dikena ngurang penanggul ai tebasau.

Kelimpah ari nya, pejalai nya mega ngelawa sekeda endur bukai nyengkaum Kampung Gersik, Kota Sentosa enggau Stakan, ngabas projek bekal ai enggau sapat bah.

Ba pekara bekaul sektor kuasa, Datuk Amar Fadillah madah, penemuai ngagai stesyen kereban api mayuh guna asil kerejasama entara SEDC Energy enggau Petronas mandangka teknologi hidrogen ulih dikena di Sarawak.

Ku iya, stesyen nya nyendiaka kereban ngisi hidrogen, ngechas entukar elekterik sereta kereban api konvensional, taja teknologi nya agi ba renggat tumu lalu empai ulih dikomersial.

“Projek tu belabuh April 2022 lalu tembu Ogos 2024 ngena ungkus urung RM10 juta, ti mandangka teknologi hidrogen ulih dikena maya diatu,” terang iya.

Ngenang silik, iya madah ke projek Langgur Sapat Bah (RTB) Sibu Pasar Ketiga beungkus RM97.2 juta ti tembu Disember 2023 udah diserah ngagai Perintah Sarawak.

Naka diatu, ku iya, tiga projek RTB di Sibu udah tembu, lalu dua iti agi projek benung dirandau enggau ti dipelaba deka ngena ungkus bela ngelui RM120 juta enggau RM469 juta.

"Di Kuching, projek RTB Kuching Renggat 2 ti mega mungkur Samarahan diadu ba renggat perambu lalu deka dibai ke Aum Bala Menteri sebedau dikemendarka digaga,” ku iya.

Iya nyemetak madah, kerejasama rat entara Perintah Besai enggau nengeri beguna endar dikena nentuka pengawa ngatur pemansut ai mujur agi, lalu nyamin bekal ai beresi ti meruan ngagai rayat Sarawak.

Sama datai, Sapit Menteri Pemansang Genturung Pendiau enggau Kandang Menua ti mega Kaban Parlimen Samarahan, Datuk Rubiah Wang, Kaban Kunsil Nengeri (ADUN) Stakan, Datuk Hamzah Brahim, ADUN Sentosa, Wilfred Yap Yau Sin, Tuai Sekretari Opis Menteri Idar Kuasa enggau Transformasyen Ai (PETRA), Dato’ Sri Mad Zaidi Mohd Karli, Sekretari Unit Kanan (Pengatur Pengawa) PETRA, Dato’ Mohd Norhisham Musa, Sekretari Perintah Besai Sarawak, Dato’ Ahmad Nadzri Mohd Hassan, Sapit Tuai Direktor (Sektor Bisnes) Opis Parit enggau Entali Ai Malaysia, Ir. Mohd Azmin Hussin, Direktor Opis Parit enggau Entali Ai Sarawak, Datu Ir. Ts. Ahmad Denney Ahmad Fauzi sereta Residen Bagi Menua Samarahan, Mohamad Irwan Bahari Bujang.-EDISI UKAS