KOTA SAMARAHAN: Perintah Besai nengah Opis Menteri Idar Kuasa enggau Transformasyen Ai (PETRA) majak ransing ngaduka projek nagang bah di Sarawak enggau nyerah dua projek Langgur Sapat Bah (RTB) ti udah tembu ngagai Perintah Sarawak ti ngena belanja manggai RM107.2 juta.

Sapit Menteri Besai ti mega Menteri Idar Kuasa enggau Transformasyen Ai, Datuk Amar Fadillah Yusof madah, dua iti projek nya digaga Opis Parit enggau Entali Ai (JPS) nyengkaum RTB Stakan beungkus RM10 juta enggau RTB Sibu Renggat 3 ngena ungkus RM97.2 juta.

Ku iya, RTB Stakan digaga dikena mutar penanggul bah tunggal enggau bemusin ba seradak Sungai Stakan ketegal pemansang deras entara menua Kuching enggau Samarahan.

“Ngena chara injinjiring begulai, projek nya mujur nambah kapasiti ai anyut enggau nyaga penganyut ai, sereta nyamin pengelikun urung 5,000 rayat dia.

“Projek tu mega nyaup ngurangka penusah reta tengkira jai enggau empas penusah bah ngagai komuniti menua,” ku iya lebuh ngatur pejalai gawa ke Kampung Bukit Berangan ditu, Hari Satu.

Iya nerang baru, RTB Sibu Renggat 3 digaga dikena mutar pemaruh gaya geografi mengeri Sibu ti besatup ba Batang Rajang enggau Batang Igan.

Ku iya, menua nya suah ampuh, kelebih agi maya ujan bangat diumba ai pasang raya.

"Projek tu mega berundingka gaya tanah kerapa ti tebal agi dikena mutar penanggul tanah tekerap, lalu nentuka pengasi timpuh panjai sistem sapat bah ti digaga.

“Ari kededua projek tembu tu, penusah bah ba menua nya disadang ulih dikurang, lalu nyamin aktiviti sosioekonomi peranak menua dia,” tandu iya.

Sama datai, Sapit Menteri Pemansang Genturung Pendiau enggau Kandang Menua ti mega Kaban Parlimen Samarahan, Datuk Rubiah Wang, Kaban Kunsil Nengeri (ADUN) Stakan, Datuk Hamzah Brahim, ADUN Sentosa, Wilfred Yap Yau Sin, Tuai Sekretari Opis Menteri Idar Kuasa enggau Transformasyen Ai (PETRA), Dato’ Sri Mad Zaidi Mohd Karli, Sekretari Unit Kanan (Pengatur Pengawa) PETRA, Dato’ Mohd Norhisham Musa, Sekretari Perintah Besai Sarawak, Dato’ Ahmad Nadzri Mohd Hassan, Sapit Tuai Direktor (Sektor Bisnes) Opis Parit enggau Entali Ai Malaysia, Ir. Mohd Azmin Hussin, Direktor Opis Parit enggau Entali Ai Sarawak, Datu Ir. Ts. Ahmad Denney Ahmad Fauzi sereta Residen Bagi Menua Samarahan, Mohamad Irwan Bahari Bujang.-EDISI UKAS