Projek BALB RM3.47 Bilion Diserah, Nyungkak Bekal Ai Menua Pesisir
KUCHING: Pemutus Perintah Besai nyerah 80 projek Bekal Ai Menua Pesisir (BALB) beungkus RM3.47 bilion ngagai Perintah Sarawak nyadi pengawa strategik ngerumban bekal ai beresi, kelebih agi ba menua pesisir.
Sapit Menteri Besai, Datuk Seri Dr Ahmad Zahid Hamidi madah, pengawa nya ngayanka chara beratka asil entara Perintah Besai enggau Perintah Sarawak nentuka infrastruktur pemun digaga meruan agi, berurun enggau besai empas ngagai rayat.
Ku iya, pengawa diserah ngagai Opis Bekal Ai Menua Pesisir (JBALB) Sarawak dikeandal ulih ngerumban projek sebedau dipejalai nengah Langgur Pemansang Malaysia Lumpar Ke-11 enggau Ke-12.
“Ari semua 80 projek, bisi 50 projek diatu benung dipejalai, semilan udah tembu, 20 ba renggat pengudah digaga kelimpah bisi siti dikinsil,” ku iya ba aum media pengudah betuai ke aum penyeraris projek BALB ditu, Hari Dua.
Iya nyemetak madah ke kededua perintah selubang penemu ngemeratka pengawa mutar dibanding besalahka pangan diri, nyengkaum nyerenih baru atur ke bisi ti ulih ngasuh projek laun.
Ku iya, pengawa nyerah nya mega ngaul pengawa berandau enggau Opis Menteri Pekara Wang, Opis Menteri Ekonomi sereta agensi bekaul nentuka pengawa lanchar nadai ngeruga pekara undang-undang.
Iya mega nerima manah chara dilanggur Opis Menteri Utiliti enggau Telekomunikasyen Sarawak ti meri perati ngagai penyikar gawa lalu nadai nejuka atur ditetapka.
“Sarawak bisi langgur kediri nyapai bungkur bekal ai penuh manggai 2030, lalu naka diatu, perintah nengeri mujur nyapai urung 93 peratus, siti pemujur ti patut dikemegah,” terang iya.
Dulu ari nya, pemutus nyerah projek BALB ngagai Perintah Sarawak udah dipesetuju ba Aum Bala Menteri kena 17 Mac 2026.
Sepenyampau RM141.87 juta udah diagih ba baruh Rolling Plan Keterubah (RP1), Langgur Pemansang Malaysia Lumpar Ke-13 (RMK13) taun 2026 dikena nyukung pejalai projek.
Sama datai, Menteri Utiliti enggau Telekomunikasyen Sarawak, Dato Sri Julaihi Narawi enggau Sapit Menteri Pemansang Genturung Pendiau enggau Kandang Menua, Datuk Rubiah Wang sereta bala tuai opis.-EDISI UKAS
