MERADONG: Program Nemuai Mantar Gawai di DUN Meradong nyadi pelasar strategik ngundang rayat sereta nerangka bemacham inisiatif Perintah Sarawak ngagai peranak rumah panjai nyerumba nyau semak hari besai Gawai Dayak.

Kaban Kunsil Nengeri (ADUN) Meradong, Datuk Ding Kuong Hiing madah, program ninting taun nya ukai semina lambang penyerakup enggau basa ba budaya raban bansa Dayak aja, tang nyadi pelasar beguna bekunsi penerang bekaul bantu enggau insentif perintah terus ngagai rayat.

Ku iya, pejalai hari keterubah ngagai sekeda rumah panjai ba menua Sungai Lemayong nyadi sebagi ari pengawa seruran dipejalai nentuka semua rayat dia enda dikelaung ngasaika pemansang.

“Bisi 184 rumah panjai di DUN Meradong lalu aku ransing ngundang semua sida datai ba hari ngintu Gawai Dayak ninting taun,” ku iya.

Iya nyebut jaku nya lebuh ngatur Pejalai Mantar Gawai DUN Meradong di rumah panjai menua Sungai Lemayong ditu, kena Hari Satu.

Iya mega ngena peluang nya nerang bemacham inisiatif ti dipejalaika Perintah Sarawak betuai ke Premier Sarawak, nyengkaum Kenyalang Gold Card, Bantu Barang Diguna Pemun Sarawak (SKAS), Program Bantu Pengerai Orang Tuai Sarawak (SCHB), Bantu Indai Beranak (BIB) sereta Endowment Fund Sarawak (EFS).

Iya madah baru, sektor pelajar mega diberi perati nengah Skim Pelajar Tinggi Pechuma Sarawak (FTES) ti meri peluang ngagai anak Sarawak nampung pelajar di institusyen enggi nengeri baka Swinburne University of Technology Sarawak, Curtin University Malaysia, University Technology of Sarawak enggau i-CATS University College.

Berindik ari nya, iya meransang rayat seruran meri sukung ngagai pengari rayat Gabungan Parti Sarawak (GPS) dikena nentuka pemansang infrastruktur sereta pengelantang rayat menua pesisir terus dijaga.

Ba hari keterubah program nya, iya nemuai ngagai enam buah rumah panjai di Sungai Lemayong iya nya Rumah Ampa, Rumah George, Rumah Chemuring, Rumah Dipa, Rumah Likut enggau Rumah Badi.- EDISI UKAS