KUCHING: Kontinjen Sarawak majak ransing besikap napi pekit Lumba Malaysia (SUKMA) Ke-22 ti deka diatur di Selangor bulan Ogos tu.
Tu dipandang nengah randau Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu begulai enggau serakup lumba, menijar tim, pegawai pemansang lumba enggau jurulatih ti diatur ditu, kena Hari Dua.
Sama datai ngulu randau nya Pemangku Direktor Kaunsil Lumba Nengeri Sarawak (MSNS) ti mega Pemangku Tuai Pegawai Eksekutif Kaunsil Lumba Sarawak, Khairul Nizam Morshidi.
Randau nya bekaul aktiviti baka selama ungkup kontinjen Sarawak ninting SUKMA dikena ngaluska pengawa besikap pemadu baru kontinjen sebedau pekit belabuh.
Awak nya bela dikena nyidi pemar ti deka ditapi, mutar pengelemi ke agi bisi enggau ngatur pengawa ti patut ari sukut besikap tauka ngintu pengelantang atlit ila.
Kontinjen Sarawak bekejang ke Selangor nyabung juluk ati besai ngetanka gela champion.
Ke penemu mayuh, SUKMA Ke-22 deka diatur ari 15 nyentuk 24 Ogos di Selangor ke bisi 37 bansa lumba enggau main mungkur 474 achara. - EDISI UKAS
