SRI AMAN: Pengeransing Perintah Sarawak pegai Gabungan Parti Sarawak (GPS) nentu bekal ai beresi majak disungkak digaga nengah macham projek strategik nyengkaum di Sitak Sri Aman.

Menteri Utiliti enggau Telekomunikasyen Sarawak, Dato Sri Julaihi Narawi madah, pengawa nya digaga nengah Pelin Besai Ai Sarawak, Sistem Grid Ai Sarawak enggau Program Ngurang Ai Tebasau ke dipelanja Perintah Sarawak empu.

Kuiya, projek nya deka diatur opis menteri iya nengah agensi baka Opis Bekal Ai Menua Pesisir (JBALB) enggau Sarawak Water.

"Ba Sitak Sri Aman, siti Loji Ai mekal 75 juta liter sehari (MLD) benung digaga di Engkilili.

"Loji tu deka nyaup Loji Ai Bayai ke diatu mekal ai urung 53 MLD di Sri Aman," pia ku iya nengah laman Facebook iya, empai lama tu tadi.

Iya mega madah, beberapa iti loji ai mit bela nyaup guna ai menua nya nyengkaum di Lingga (1.65 MLD), Melugu (0.65 MLD), Skrang (0.65 MLD), Engkilili (1.30 MLD), Pantu (2.0 MLD), Seduku (2.0 MLD), Stumbin (0.65 MLD), Lubok Antu (15.0 MLD) enggau LDS Lubok Antu (2.20 MLD).

Kelimpah ari nya, iya madah, Sistem Bekal Ai Serantau Sri Aman ari Loji Ai Engkilili enggau Bayai bela dikemendarka digaga ke nyadi sebagi ari pemansang grid ai nengeri.

Nengah sistem nya, sambung paip ai ditambah enggau chara berenggat ari Engkilili ke Bayai lalu terus datai di Pantu enggau Lingga.

Ukai semina nya, pengawa nganti sereta ngadu paip lama bela chakah dipejalaika JBALB. -EDISI UKAS