KUCHING: Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol udah datai ngabas anak staf Unit Komunikasi Awam Sarawak (UKAS), Muhammad Rais Sanusi ke diatu benung diperubat ba Hospital Besai Sarawak (HUS), Hari Tiga.

Iya disempulang Direktor UKAS, Awang Putrayusrie Awang Redzuan ngena awak nya meri jaku peransang sereta bela besampi ngambika gerai baka selama.

Penatai iya maya nya bela mandangka pementas sereta penyiru ngagai sida ke benung napi penguji kelimpah berupai ngayanka pemanah begulai baka diri sebilik ba servis kereja perintah nengeri alai pengelantang raban gawa sereta diri sebilik semampai dikenatika.

Berebak enggau nya, Datuk Abdullah mega ngabas tukang gambar Pertubuhan Berita Nasional Malaysia (Bernama) Sarawak, Razali Nordin ti bela benung diperubat ba hospital nya.

Kelai sukung sereta ngenang pengawa ba media ngelama tu, Datuk Abdullah bisi nyuaka pemeri ari iya empu enggau ari Gerempung Pengintu Pengelantang UKAS ngagai Razali.

Iya ngarapka pemeri nya ulih ngelempungka mimit tating penusah ke benung ditapi Razali, 54, ke udah gawa lebih dua puluh taun ba media.-EDISI UKAS