KUCHING: Kaunsil Pemansang enggau Pengintu Tanah (LCDA) majak ransing bejalaika pangku pengawa nyungkak pemansang ekonomi Sarawak, kelebih agi nengah pemansang tanah Adat Bansa Asal (NCR) enggau inisiatif agropakar ti meri empas terus ngagai pengelantang rayat.
Sapit Premier Sarawak, Datuk Amar Awang Tengah Ali Hasan madah, LCDA ukai semina ngaul diri ba sektor betanam betupi ari ngatur ladang diri empu aja, tang nyadi ejen pengatur (managing agent) ba pemansang tanah NCR ti nyaga hak pengempu tanah.
Ku iya, chara nya ngasuh tanah ti sebedau tu repa dikemansang manah ngena chara pemansang NCR baru enggau kerejasama sektor peribit.
“Pengawa tu ngerandang peluang ngagai pengempu tanah bulih dividen, kelimpah nyendia pengawa puang enggau ngeranchak aktiviti ekonomi ba komuniti menua,” ku iya.
Iya nyebut jaku nya lebuh dirandau media ba Pengerami Ramah Tamah Aidilfitri LCDA 2026 di Dewan Serbaguna CATS FM, kena Hari Enam.
Iya mega madah ke LCDA diatu dilempai tanggungpengawa ngemansangka sekeda menua nyadi agropakar ti nyendiaka chukup perengkaguna dikena matak pemeranak puku enggau pekebun.
Ku iya, konsep agropakar ti inklusif agi ukai semina meri peluang ngagai orang enggau kompeni ngereja pengawa betanam betupi baka nanam sayur, tang mega meransang pemansang aktiviti ili (downstream).
“Ambi ke chunto, LCDA mega ngemudi pengawa nanam nanas enggau inyak, kelimpah meri perati ngagai pekara makit enggau nginti dikena nambahka rega asil kebun,” ku iya.
Iya madah baru, mayuh agi projek agropakar deka dikemansang dudi hari dikena ngerembaika kaul sektor peribit sereta negapka rentayan rega industri betanam betupi nengeri.
Inisiatif nya seriris enggau pengeran perintah nengeri nentuka pemansang ekonomi ti inklusif enggau meruan, sereta ngangkatka tikas idup peranak menua pesisir di Sarawak.
Sama datai, Sapit Menteri ba Opis Premier Sarawak (Penyeraris Projek Agensi Pemansang Kandang Menua, DBKU enggau Pekara islam), Datuk Dr. Abdul Rahman Junaidi, Sapit Menteri Pemansang Pengelantang Komuniti, Sarawak, Datuk Mohammad Razi Sitam enggau Menijar Besai Datu Sr. Zaidi Mahdi.- EDISI UKAS
