Muzium Pesaka Industri Brooke Dockyard Berengkah Dibuka Pagila
KUCHING: Muzium Pesaka Industri Brooke Dockyard deka dibuka berengkah ari pagila sepengudah dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg lemai tu.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, muzium nya disadang ulih nyadi pematak baru ba mengeri tu kelimpah nyungkak sektor dagang temuai bepelasarka pesaka enggau sejarah.
"Brooke Dockyard Industrial Heritage Museum (Muzium Pesaka Industri Brooke Dockyard) tauka sebadau tu Brooke Dockyard iya nya dok kapal keterubah digaga di Borneo enggau Malaysia ba taun 1912 maya jeman Charles Brooke menya.
"Keterubah suba palan tu semina nyendiaka servis kapal raja sebedau nyadi alai ngadu kapal, minyak enggau gas sereta palan latih injiniring ti bela nyadi palan industri keterubah," ku iya.
Iya madah ke pekara nya sepengudah ngatur penemuai basa ngagai Premier Sarawak ba Kompleks Satria Pertiwi, Hari Satu.
Tuju penemuai basa nya dikena ngelaluka penatai Premier Sarawak bejadika muzium nya.
Kelimpah ari nya, Dato Sri Abdul Karim madah, muzium nya bisi digagaka galeri nyengkaum mesin lama ke dikena dia enggau program pemandang bekaul evolusyen industri.
Iya madah, naka ke diatu nadai bebayar tama muzium nya lalu iya andal muzium nya deka nyadi siti agi palan pematak temuai baka Muzium Budaya Borneo enggau Kampung Budaya Sarawak.
Bela datai maya penemuai basa nya Direktor Opis Muzium Sarawak Nancy Jolhi enggau sapit iya, Yasmin Khalid Nicholls.-EDISI UKAS
