MIRI: Pengawa ngenegap pengulih mansik enggau nyaga sereta ngintu ekosistem marin Sarawak majak disungkak alai Perbadanan Perhutanan Sarawak (SFC) ngelancharka kapal pemansik marin keterubah iya nengah Projek COREEFS.

Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh madah, kapal nya deka nyaup pengawa bekaul pansik saintifik enggau matau biodiversiti marin ba kandang tasik Sarawak.

"Vesel tu nyadi pengawa meranakka puku strategik ba pengeransing Sarawak ngatur pengelikun marin.

"Tu deka nyungkakka pengulih kitai ngaduka pengawa mansik saintifik sereta nentu pengelikun marin ungkup rebak dudi," ku iya.

Iya bejaku munyi nya maya pengerami ngelancharka kapal pemansik marin keterubah SFC nengah Projek COREEFS ke diatur ba Penyangkai UKPS ditu, Hari Satu.

Nangkan nya, Manijer Besai SFC Abang Arabi Abang Aimran madah, pengawa sehari nya beguna dikena nyungkakka pengulih ngadu pengawa mansik marin di nengeri tu.

"Tu siti kelai pengulih SFC ngaduka pengawa mansik lebih agi bekaul nyaga pengelikun marin enggau ekosistem tasik.

"Nengah Projek COREEFS ke bela bisi kerejasama ari bakih strategik baka Bintulu Port Authority, kitai ulih nentu pengelikun marin ke dipejalai enggau meruan agi," ku iya nerang.

Projek COREEFS siti inisiatif ke besai reti ba pengawa ngintu enggau nyaga ekosistem marin enggau biodiversiti tasik Sarawak. -EDISI UKAS