Nadai Kes Bebadi Nyawa Ketegal Rabies Manggai 2030
KUCHING: Sarawak chakah agi munas rabies enggau netapka juluk nadai kes bebadi nyawa manggai 2030 berindik ari 86 ari 93 kes ngerampit mensia kenyau ari 2017 ti nabanka nyawa, lalu begunaka penyikar enggau pengawa inklusif agi.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, pekara nya mandangka rabies ukai semina isu jelu aja, tang ngeruga pengerai mensia mayuh ti tau nabanka nyawa enti enda diputar jampat.]
“Ari 93 kes, 86 pemati tu nunjukka pengeraya penanggul tu lalu kitai enda tau empelita,” ku iya lebuh bejaku ngari ke Premier Sarawak maya Program ORV Distribution and Mass Vaccination Programme di Dewan Perpaduan, RPR Renggat 1 & 2 Batu Kawa kena Hari Enam.
“Kitai ukai semina berati ke nadai diketup, tang nadai pemati,” ku iya nyemetak.
Iya mega madah, kelimpah vaksinasyen, mensia mayuh ti bisi penemu ngadu pengawa enggau lengkas pengudah diketup jelu mega patut ditambah dikena nyeliah majak raya.
“Rabies ulih diperubat, tang enti igi penyakit udah datai ba untak, tu tau naban ke nyawa,” terang iya.
Ngenang pekara sama, Sarawak nyadi entara pemadu tumu di Malaysia bejalaika ORV nyadi chara alternatif vaksinasyen ukui lelang ti tusah digiga ngena chara selama.
Program nya mega ngaul pengawa betuchuk vaksin bebala mayuh, lisin jelu, tungkap ruang bilik sereta ngempung data dikena negap perambu strategik munas rabies di nengeri tu.
Naka Mac 2026, penyampau ukui di Sarawak dipelaba bisi 66,523 iku ke alai vaksinasyen agi kurang iya nya urung 9 peratus, jauh ari ditetap 70 peratus dikena nyapai imuniti raban.
Kelimpah ari nya, iya madah, Premier Sarawak ngemendarka geran RM30,000 dikena nyukung program nya, seraya tambah RM20,000 ari kuchik iya empu.
Sama datai, Sekretari Mendam Opis Menteri Industri Pemakai, Komoditi enggau Pemansang Kandang Menua Sarawak, Datu Sirai Daha, Direktor Opis Servis Veterinar Sarawak (DVSS), Datu Dr. Adrian Susin Ambud sereta Presiden Sarawak Society for the Prevention of Cruelty to Animals (SSPCA) Datin Dona Drury Wee.-EDISI UKAS
