KUCHING: Pemujur projek pemungkal Oral Rabies Vaccine (ORV) ba menua mudah kena rampit ngelingi Kuching deka nentuka pengawa ngena chara nya ke selampur Sarawak.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, inisiatif nya dipejalai nyadi alternatif ti praktikal agi mutar penekul vaksinasyen konvensional ti napi mayuh penekul.
“Chara betuchuk napi mayuh penekul, nyengkaum mar ngatur ukui enggau pengempu enda ulih mai jelu ke palan betuchuk vaksin.
“Nya kebuah kitai berati ke ORV tu nyadi alternatif ti praktikal enggau ulih nambah bungkur vaksinasyen,” ku iya lebuh dirandau media pengudah pengawa nya di Dewan Perpaduan, RPR Renggat 1 Batu Kawa kena Hari Enam.
Iya madah, menua baka Batu Kawa dipilih nyadi taba pengepun projek ketegal endur nya mudah kena rampit.
“Enti projek tu bisi asil positif, kitai deka ngerembaika pengawa ngagai bagi menua bukai di Sarawak, tang nya ukai siti pengawa ti muntang,” terang iya.
Iya nyemetak madah, pemujur chara nya endang bepanggai ba tikas penemu mensia mayuh enggau kerejasama semua raban.
“Pangku pengawa media beguna endar ngenataika penerang ngambi rayat mereti ke utai ti nyadi lalu jampat ngereja utai ke patut enti diketup,” ku iya.
Iya mega madah, chara begempung ngaul agensi perintah, raban bekuasa lokal enggau NGO deka terus ditegap nentuka projek mujur.
Kelimpah ari nya, data ti betul beguna endar nyengkaum penyampau jelu, pengempu enggau kes diketup mega diberi perati dikena negapka perambu strategik.
Pengawa bekenaka teknologi baka microchip mega benung dikerembai dikena nambahka pengawa matau enggau ngatur jelu inang chara sistematik agi.
