KUCHING: Sarawak ngenegapka pengulih bidang Sains, Teknologi, Injiniring enggau Matematik (STEM) nyadi pelin besai Sarawak dikena nempa orang gawa bepengelandik seraya nengkebang mayuh agi pengawa puang dudi hari ungkup peranak menua tu.
Premier Sarawak ke mega Chairman Gabungan Parti Sarawak (GPS), Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, diatu raban pengaji begunaka mayuh orang gawa bepengelandik ba bidang nya nyerumba pemansang teknologi baru di nengeri tu.
Ku iya, dikena nentuka gradute menua tu mengkang relevan nitih peminta industri, Perintah Sarawak udah ngelangkar Skim Pelajar Tinggi Pechuma (FTES) ti bisi 64 bengkah program bepelasarka STEM.
"Kus tu nyangka tusah lalu kitai merangsang bala anak ngambi subjek ti bisi bekaul enggau STEM laban ekonomi kitai nyentuk 2037 semua bepelasarka kus ti ba kitai tusah, tang kitai nguji meransang anak kitai ba kus nya," ku iya.
Iya bejaku munyi nya ba pengawa nutup Konvensyen GPS ba Palan Konvensyen Borneo Kuching (BCCK) ditu, Hari Minggu.
Nerang silik, ku iya, chara nya beguna dikena mutar penanggul kus ke diambi enda nipak peminta gawa ba raban gradute ketegal bisi milih bidang ti kurang diguna.
Kelimpah ari nya, iya mega madah, Sarawak betapi enggau penanggul suntuk raban gawa bepengelandik baka injiniring enggau teknologi pemadah, alai bidang STEM patut bendar disungkakka agi.
Bela datai maya nya Sapit Menteri Besai Datuk Amar Fadillah Yusof, Sapit Premier Sarawak Datuk Amar Douglas Uggah Embas, Datuk Amar Profesor Dr Sim Kui Hian enggau Datuk Amar Awang Tengah Ali Hasan, Menteri ba Opis Premier Sarawak ke mega Presiden Parti Rakyat Sarawak (PRS) Dato Sri John Sikie Tayai sereta pemesai ke bukai. -EDISI UKAS
Disediakan oleh: Nur Nabilla
Foto: Ibanez Jeffery Guang
