Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kelalu bepanggai ba minyak konvensional baka diesel tau nanggul geopolitik ti patut ngalih jampat ngagai pemansut kuasa alternatif ti tegap enggau meruan agi.

Ku iya, pemansang teknologi maya diatu mega ngerumban pengulih kuasa hidrogen nyadi pilih ti kompetitif enggau maju agi.

“Ari rega diesel diatu, pengawa ngeluarka hidrogen deka mudah agi ari diesel.

“Proses elektrolisis deka jauh mudah laban membrane baru ba teknologi enggau diesel tu ditekul geopolitik diatu, aku ngasai ke tu enda pukas ba jeman tu. Penanggul deka datai. Reti ku aku, kuasa alternatif deka dikena lalu kitai benasip manah. Sarawak udah sedia,” ku iya.

Iya nyebut jaku nya ba aum media pengudah pengawa bejadi Konvensyen Gabungan Parti Sarawak (GPS) di Palan Konvensyen Borneo Kuching (BCCK) kena Hari Minggu.

Iya madah, ari ke ngadang utai ti nyadi nya mega nyata dipeda nengah ngerembaika pengawa bekenaka kuasa ukih dikena baru ba menua pesisir, nyengkaum inisiatif kuasa solar di Baram ti sebedau tu bepanggai ba generator diesel.

Iya nerang, Skim Kuasa Karan Alternatif Menua Pesisir Sarawak (SARES) dipejalai ngena kuasa solar ukai semina enda kelalu bepanggai ba diesel aja, tang mantu nyaga komuniti menua pesisir ari ditating rega minyak niki sereta nentuka pengelantang rayat terus dijaga.

Sama datai ba aum media nya Sapit Premier Sarawak Datuk Amar Douglas Uggah Embas, Sapit Premier Sarawak ke mega Presiden Parti Sa’ati Rayat Sarawak (SUPP) Datuk Amar Profesor Dr Sim Kui Hian, Sapit Premier Sarawak Datuk Amar Awang Tengah Ali Hasan, Presiden Parti Rakyat Sarawak (PRS) Dato Sri John Sikie Tayai, Sapit Presiden Parti Demokratik Progresif (PDP) Datuk Henry Harry Jinep, Sekretari Besai Parti Pesaka Bumiputera Bersatu Sarawak (PBB) sereta pemesai bukai. -EDISI UKAS

Pemberita: Nur Nabilla

Gambar: Clevelance Sam