KUCHING: Sarawak diatu ba batang pejalai angkat ngagai tikas pemansang ti tegap manggai 2030, enggau timpuh lima taun deka datai nyadi penyungkak transformasyen nya.
Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Prof Dr Sim Kui Hian madah, timpuh nya deka nyadi pelasar besai Sarawak ngalih ngagai pemansang bepuguka pemansang ti nyerangkung semua.
“Kandang lima taun deka datai, Sarawak deka majak ngerembai enggau nyapai tikas pemansang manggai 2030,” kiu iya.
Iya nyebut jaku nya lebuh bejaku ba mua mayuh maya Konvensyen Gabungan Parti Sarawak (GPS) di Palan Konvensyen Borneo Kuching (BCCK) kena Hari Minggu.
Konvensyen nya udah dipenyadika Premier Sarawak ke mega Chairman GPS Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Presiden Parti Sa’ati Rayat Sarawak (SUPP) nya madah baru, agenda pemansang infrastruktur deka chakah dipejalai, kelebih agi mutar isu pemun ti nekul rayat.
“Ngelama tu, agi bisi penekul baka bekal ai enggau perengkaguna jalai ti patut dikemanah. Kandang lima taun deka datai, pengawa deka majak dipejalai dikena nentuka peminta tu ditangkup semua,” terang iya.
