KUCHING: Inisiatif Program Bakih Komuniti TEGAS terus negap pengawa ngenatai penerang pelajar berurun enggau inklusif agi seraya nyukung Skim Pelajar Tinggi Pechuma Sarawak (FTES) ba selampur nengeri.

Sapit Menteri Pengangkut Sarawak (Langit enggau Darat), Datuk Dr Jerip Susil madah, program nya nyadi pelasar randau strategik ti nyambung polisi pelajar perintah enggau raban diselinting kelebih agi nembiak ba renggat baruh.

Ku iya, ba landskap pelajar ti majak dinamik, pemar besai diatu ukai agi kurang peluang, tang mega nentuka penerang datai enggau betul, lengkas enggau ngaul komuniti.

“Pangku pengawa pengajar kaunseling nyadi frontliner engkeman amat dikena ngembing nembiak ngaga pemutus bekaul tunga kuing pelajar enggau kereja nipak peminta makit kereja dudi hari,” ku iya.

Iya nyebut jaku nya ba Pengawa Nangguh Program Bakih Komuniti TEGAS di TEGAS Digital Village, Hari Tiga.

Nambah ke nya, iya mega meri terima kasih ngagai raban pengatur sereta bakih strategik nyengkaum Opis Menteri Pelajar, Inovasyen enggau Pemansang Penau Sarawak (MEITD) enggau Opis Pelajar Nengeri Sarawak (JPNS) ke pengeran ngemujur program nya di selampur Sarawak.

Ngenang silik, iya nyemetak madah ke FTES nya siti reformasyen polisi ti meri peluang besai agi ngagai anak Sarawak nampung pelajar ngagai tikas tinggi enggau nadai suntuk pekara wang.

“Keterubah iya, akses pelajar tinggi ukai semina ditekul suntuk belanja aja, tang bepelasarka pengulih enggau penau nembiak,” terang iya.

Ku iya agi, inisiatif baka Program Bakih Komuniti TEGAS mega ngesan pangku pengawa besai nentuka penerang bekaul FTES datai ngagai nembiak enggau apai indai kelebih agi ba menua pesisir ti sebedau tu napi penanggul akses penerang.

Ba pekara sama, ku iya, FTES mega nunjukka empas positif lebuh majak mayuh nembiak belabuh ngambi bagi ba bidang Sains, Teknologi, Injiniring enggau Matematik (STEM) sereta pelajar tinggi nipak peminta industri dudi hari.

“Rebak biak nya aset strategik nengeri ti deka ngisi sektor besai nyengkaum industri teknologi enggau dagang bepelasarka inovasyen,” ku iya.

Berebak enggau nya, iya ngarap rentayan kerejasama ti ditanggam nengah program nya ulih ditandu dikena negap komuniti pelajar sereta nempa mayuh agi modal mensia bekualiti di Sarawak. -EDISI UKAS