SINGAPURA: Opis Dagang enggau Dagang Temuai Sarawak di Singapura (STATOS) majak ransing bejalaika pangku pengawa besai negap produk lokal ba makit antarabansa nengah pengawa nyeraris Sarawak Pavilion di Food & Hospitality Asia (FHA) 2026 diatur pengelama empat hari di Singapore Expo.
Tuai Pegawai Eksekutif STATOS, Chew Chang Guan madah, Sarawak Pavilion sekali tu ngempung 19 pemekuh industri, nyengkaum lima pemandang baru ti keterubah ngulu pemandang besai nya.
“Bala penyereta tu nganyanka orang dagang Sarawak majak gagit rembus makit global.
"Kami (STATOS) mega gaga meda bala pemandang baru datai ti ulih bulih asil ti manah,” ku iya lebuh dirandau Unit Komunikasi Awam Sarawak (UKAS) ditu, Hari Empat.
Ku iya, pelasar baka FHA meri peluang ngagai sida berandau enggau bala ti meli ari antarabansa sereta nempa rentayan dagang.
Taja pia, iya ngingatka makit Singapura chukup kompetitif mega begunaka pemintar ngatur rega.
“Ukai semina produk engkeman ungkup makit tu. Nya alai, orang dagang patut mereti ke gaya makit ngambi produk dijual sida ukai semina ulih besemekih aja, tang nangkup peminta penguna,” terang iya.
Ari sukut konsep, Chew nerangka Sarawak Pavilion sekali tu ngena gaya sedandang ti kemerah agi, kelimpah berati ke pemandang ulih ngatur randau dagang enggau lantang.
Kelimpah ari nya ku iya, elemen visual ngena chura rasmi Sarawak, iya nya kuning, chelum enggau mirah, narit ati pengusung ari jauh, lalu nya nambah tubuh bala ti datai meda pemandang nya.
“Ari timbal diterima taun nyin tadi, pemandang begunaka endur ti lantang agi ungkup randau. Nya alai, taun tu kitai ngena ripih ti praktikal enggau ngelantangka dagang,” ku iya.
Chew nyemetak madah, bala ti ngambi bagi ba pemandang baka nya beguna endar dikena nempa pengandal makit.
“Pengandal orang ti meli ukai datai ari siti pengawa aja. Kompeni patut seruran bisi, berandau enggau penguna enggau ngayanka kredibiliti produk sida,” ku iya nyemetak.
STATOS andal mayuh agi kompeni Sarawak deka ngambi bagi pavilion nya dudi hari, lebih agi manggai 2027, dikena ngerembaika makit produk Tanah Kenyalang ke makit global.-EDISI UKAS
