STATOS Ngembing Pemandang Sarawak Besikap Ke Makit Eksport
SINGAPURA: Sarawak Pavilion ngambi bagi ba Food & Hospitality Asia (FHA) 2026 di Singapore Expo meri perati ngagai penyikap bala pemandang nangkup peminta makit eksport ti majak kompetetif.
Menijar Kanan Unit Dagang enggau Beranak Puku ba Opis Dagang enggau Dagang Temuai Sarawak di Singapura (STATOS), Tan Teng Cheng nyemetak madah, pengawa milih bala pemandang endang terit.
Iya madah, pekara nya dikena nentuka semina kompeni ti amat udah nyikap diri aja dipandang ba pelasar antarabansa nya.
“Penteba milih tu bepelasarka sekeda sukut beguna baka pengulih produk rembus makit, tikas kualiti enggau timbal pemeli antarabansa ngagai produk sida.
“Kitai deka bala pemandang ti ngambi bagi ba program tu ukai semina ulih narit perati mensia mayuh aja tang bisi pengulih nangkup peminta makit sereta besemekih ba renggat global,” ku iya lebuh dirandau Unit Komunikasi Awam Sarawak (UKAS) ditu, Hari Lima.
Terang Tan, kompeni ti bedau manggai ba tikas penyikap ti dikedeka enda dikelaung tang diberi rintai malin dikena negap sekeda sukut sebedau ulih ngambi bagi ba makit eksport.
“Pelasar tu beguna amat dikena nentuka pengawa Sarawak ngambi bagi ba pelasar baka FHA meri empas ti besai agi ukai semina ari sukut peneleba tang pengulih dagang,” tampung iya.
Ku iya, bala pemekuh industri ti semampai rindu ngambi bagi ba Sarawak Pavilion dudi hari nyengkaum ari kompeni ti apin ngambi bagi ba edisyen sekali tu.
