MIRI: Program Miri Kitchen ti diatur serimbai Program Sarawakku Sayang Bagi Menua Miri 2026 ba Stadium Miri nyadi pelasar mantai bemacham pemakai asal Sarawak kelimpah matak penatai pengurung ari mayuh serap komuniti.

Program nya berengkah Hari Lima ti ngenah bemacham menu ti nyelai sereta mandang pesaka budaya nengeri nyengkaum kuie serabai, tuchur bubuk, ikan baung sumai kunyit enggau nuba laya iya nya asi ti ditungkus ngena daun.

Penyelai tuchur bubuk ukai semina pemakai asal aja tang bisi identiti kediri empu ngagai komuniti lokal laban tuchur nya suah dikait enggau pengawa nangkap bubuk dikena ngaga belachan.

Siku penyereta, Mirza Hasan madah, pengawa ngambi bagi ba Program Miri Kitchen meri peluang ngagai iya mantai kuie serabai ngagai komuniti kelebih agi rebak biak ti nyau enda ngelala kuie asal nya.

Iya madah, kuie nya ngembuan penyelai kediri empu ari sukut pengawa ngaga enggau perengka dikena baka buah inyak puda ti majak mar diulih.

Iya meri terima kasih ngagai perintah nengeri laban ngatur program baka nya ti nyadi siti inisiatif dikena ngelaku pemakai asal sereta mantu pedagang mit dikena ngerembai makit sida.

Seraya nya, siku pedaja tuchur bubuk, Mohamad Bakhtiar Rohani madah, Miri Kitchen nyadi pelasar pemadu manah dikena mandang bemacham pemakai ti jarang ditemu ba endur bukai kelimpah nuking pintu interaksyen enggau pengusung.

Ku iya, program tu meri peluang ngagai bala penyereta bedua penemu enggau peneleba pasal bemacham pemakai asal Sarawak.

Siku da pedaja, Demaris Abai ari Long Semadoh, Lawas madah, pengawa iya ngambi bagi ba program nya dikena mantai pemakai asal etnik Lun Bawang baka nuba laya ngagai komuniti luar.

Iya madah kediri chukup temegah ulih ngambi bagi ba program nya dikena mantai pesaka pemakai etnik sida ngagai mensia mayuh.

Bela nerima perati iya nya bansal ti nyual pemakai ikan baung sumai kunyit nitih resepi asal ari Marudi.

Pengempu bansal nya, Zubir Alwi madah, pemakai nya ngetan penulin resepi orang dulu suba ngena rempah khas ari pelilih nya.

Iya mega bela nunjuk chara nyumai ikan baung nya ngagai Sekretari Perintah Sarawak, Datuk Amar Mohamad Abu Bakar Marzuki enggau temuai dipebasa bukai ti ngabas bansal iya.

Iya ngarap ke mayuh agi bala penyereta kelebih agi ari pelilih Marudi ngambi bagi ba program nya dudi hari dikena ngerembai pengawa ngelaku pemakai asal Sarawak ngagai renggat ti tinggi agi. – EDISI UKAS