MERADONG: Program ngintu Mantar Gawai di rumah panjai meri peluang besai reti ti ngedut kaul tuai enggau peranak menua.
Kaban Kunsil Nengeri (ADUN) Meradong Datuk Ding Kuong Hiing madah, peluang ngundang rayat nengah program baka nya meri awak ngagai iya ngerandau peranak ba mayuh renggat umur.
Ku iya, randau betunga mua nya meri awak ngagai iya ninga empu sada peminta enggau penemu peranak lalu nya ngedutka agi kaul entara tuai enggau rayat.
“Maya kitai empu datai ngundang rayat ba menua, kitai nemu agi nama utai diguna enggau ditapi sida besehari-sehari,” ku iya ba program Mantar Gawai di Rumah Panjai Ulu Stras, Hari Tiga.
Iya mega madah, tetiap peminta disada peranak deka dikerandau dulu agi Tuai Rumah enggau Komiti Pemansang enggau Pengelikun Genturung Pendiau (JKKK) sebedau dibai ngagai palan servis ungkup pengawa ke patut.
Berebak enggau nya, iya mega bisi ngenang pengawa Perintah Sarawak meri perati ngagai pengawa ngintu pengelantang rayat.
Iya nyemetak madaj, penyiru perintah nengeri ba pengelantang rayat patut disukung ngambi pemansang ulih dipejalai, kelebih agi ba sitak DUN Meradong.-EDISI UKAS
