SARIKEI: Sepenyampau 1,868 nembiak ari tiga sekula sekondari di Sarikei bulih pemaik nengah Program Pemeri Uniform enggau Kasut Sekula ungkup taun 2026.

Sapit Menteri Pengawa Bekebun enggau Komoditi ke mega Kaban Parlimen Sarikei, Dato’ Sri Huang Tiong Sii madah, program nya udah semampai diatur kenyau ari taun 2018 dikena nyaup ngelempung tating apai indai dikena nyendia baju uniform sekula nembiak.

“Aku ngarap bantu tu ulih meri empas positif ngagai bala nembiak ngambi sida gaga, lantang enggau regas datai ke sekula ngiga penemu,” ku iya.

Iya madah munyi lebuh Program Nyua Baju Uniform enggau Kasut Sekula ungkup taun 2026 ngaul nembiak ari Sekula Sekondari (SMK) St Anthony, SMK Bandar Sarikei enggau SMK Tinggi Sarikei, Hari Tiga.

Ku iya, ungkup menua Sarikei, sepenyampau 5,808 nembiak bulih pemaik ari inisiatif lalu ba Meradong bisi 2,952 nembiak.

Berebak enggau nya, program nya meri pemaik ngagai 8,760 nembiak ba kededua kandang endur nya.

Iya mega muji inisiatif berani Perintah Sarawak nyendia pelajar pechuma ba palan pelajar tinggi enggi Perintah Sarawak dikena negap pemansang modal mensia.

Ku iya, inisiatif nya siti pengawa meranak puku besai ungkup pemansang rebak biak ngambi sida ulih nampung pelajar lalu enda ditating penanggul suntuk belanja.

“Tu mandangka pengeran Perintah Sarawak netapka pengelantang rayat nyadi agenda besai.

“Aku pechaya, tetiap anak bisi hak bulih peluang pelajar ti sebaka. Kena mih peluang tu enggau manah lalu bebendar belajar ungkup pengidup ti menyana agi,” ku iya baru.

Dulu ari nya, iya mega nyua pemeri sepenyampau RM20,000 ngagai SMK St Anthony enggau RM20,000 ngagai SMK Tinggi Sarikei dikena ngemujur aktiviti ninting taun sekula lalu semua pemeri nya sepenyampau RM40,000. - EDISI UKAS