Nembiak Menua Pesisir Nyulut Ba Robotik, Ngayan Penau Sebaka
KUCHING: Nembiak ari menua pesisir di Sarawak majak ngayanka penau sida besemekih enggau nyulut ba bidang robotik lebuh mujur nempa pemujur ti ngemegah ba Pekit Robotik Nasional (NRC) ba renggat nengeri diatur ari 17 nyentuk 19 Julai 2025 di Universiti Curtin, Miri.
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, pemujur sekula ari menua baka Serian, Kapit enggau Daro ngayanka nembiak menua pesisir ransing ngulihka penyulut baka nembiak bukai enti diberi penemu, belanja enggau embing ti patut.
Iya madah, program pemungkal NRC taun 2025, SJK Chung Hua Batu 35, Serian menggi lumur dua kategori Robomission Junior, seraya SMK Toh Puan Datuk Patinggi Hajah Normah, Daro bulih penuduk ketiga lalu SMK Kapit ba penuduk kelima kategori Robomission Rookie renggat sekula sekondari.
“Pemujur nya nyata ngayanka penau besai nembiak kami enti diberi penemu, belanja enggau embing ti betul.
“Aku gaga endar laban semua sekula tu ba menua pesisir. Serian, Kapit, Daro. Sida sebaka pemintar enggau orang bukai,” ku iya.
Iya nyebut jaku nya ba mua mayuh rambau Pengawa Nyua Kit Robotik serimbai Program Pemansang Pekit Robotik Nasional (NRC) Renggat Nengeri Taun 2026 di Pustaka Negeri Sarawak, ditu, Hari Empat.
Iya nyemetak madah, inisiatif ngerembaika pelajar Sains, Teknologi, Injiniring enggau Matematik (STEM) di Sarawak dipejalai inklusif nentuka nadai nembiak dikelaung ari arus pemansang teknologi, nyengkaum ba menua pesisir, nipak pengeran perintah nengeri ngemansangka penau ti sebela.
Dato Sri Roland Sagah madah baru, program nya deka ditandu enggau dikerembai taun tu enggau ngaul 60 sekula mungkur 30 sekula primari enggau 30 sekula sekondari ari mayuh Opis Pelajar Pelilih (PPD) ba selampur Sarawak.
Ku iya, tetiap sekula dipilih deka nerima set kit robotik ti dipelanja opis menteri, kelimpah pengajar deka ngulu woksyop Training of Trainers (TOT) ti diembing Sasbadi nentuka sida sedia ngembing nembiak.
Iya mega madah, sekula ti dikaul ila deka ngambi bagi NRC Renggat Nengeri 2026 ditaga diatur ari 27 nyentuk 30 Julai tu di Sibu.
Iya nerang, program pemansang nya nampung pemujur pengawa taun nyin tadi ti ngaul 13 PPD, enggau semua 26 tim mujur nurun bepekit ba renggat nengeri.
Ngenang pekara bekaul, iya madah, Sarawak udah ngayanka penyulut ba bidang robotik lebuh 10 kali nyadi champion besai nasional kenyau ari 2014 nyentuk 2025.
Ari nya ku iya, pemujur ba renggat antarabansa mega ngemegahka ati lebuh Malaysia nyadi champion besai World Robot Olympiad 2025, enggau pemekit ari Sarawak ngulihka pemujur nya.
Sama datai, Sekretari Mendam Opis Menteri Pelajar, Inovasyen enggau Pemansang Penau Sarawak Datu Adana Jed, Direktor Opis Pelajar Nengeri Sarawak Omar Mahli, Direktor Sasbadi Learning Solution Sdn Bhd Kevin Wan sereta Sapit Direktor (Sektor Pemansang Nembiak) Zamzaitul Akmal Hisham Ahmad.-EDISI UKAS
