KUCHING: Pengelikun pesakit enggau ngasi standard tinggi patut dikemerat ba tetiap prosedur beputung plastik, setipak enggau pemansang deras bidang nya diatu.

Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal Datuk Amar Profesor Dr. Sim Kui Hian madah, bidang nya begunaka latih intensif sereta ngasi ke standard ti ditetapka.

“Latih nyadi pakar beputung plastik betaun pengelama. Nadai jalai mintas ba bidang tu laban ngaul pengelikun enggau nyawa pesakit,” ku iya.

Iya nyebut pekara nya ba pengawa bejadi Sarawak Plastic Surgical Update 2026 di Muzium Budaya Borneo, ditu, Hari Lima.

Datuk Amar Profesor Dr. Sim madah, rayat patut mereti ke pengawa beputung plastik ukai semina bereti ke pekara estetik aja, tang mungkur beputung rekonstruktif ti beguna endar ba timpuh pesakit suman ketegal trauma, riman sereta timpang kongenital.

Ku iya, ba Hospital Besai Sarawak (HUS) aja, lebih 1,000 kes beputung rekonstruktif dipejalai ninting taun, lalu nya nunjukka pemesai guna bidang nya ba sistem pengerai nengeri.

Iya nyemetak madah, ngasi ke tiga elemen besai iya nya prosedur, pemekuh enggau premis nyadi pun pengawa nentuka tetiap perubat diberi nya likun enggau bisi kualiti.

Iya nerang, prosedur patut dikereja pemekuh udah ditauliah ti regista sereta bisi latih ti chukup, kelimpah dipejalai di premis ti nangkup standard pengelikun sereta disikap perengkaguna mutar sebarang utai nyadi.

Iya mega minta pemekuh industri ukai semina ngiga untung aja nyentuk ngamahka nama menua ba bidang perubat.

Ku iya, Malaysia bisi standard perubat tinggi enggau diaku ba renggat antarabansa, nya alai pemanah nama patut dijaga enggau manah.

Sama datai, Sapit Direktor Opis Pengerai Nengeri Sarawak Dr. Azlee Ayub, Direktor HUS Dr. Ngian Hie Ung, Tuai Servis Beputung Plastik enggau Rekonstruktif Nasional Dr. Mohammad Ali Mat Zain, Tuai Nengeri ke mega Tuai Opis Beputung Plastik enggau Rekonstruktif HUS Dr. Daphne Dewi sereta Pemangku Tuai Pegawai Eksekutif Business Events Sarawak Jason Tan Chin Foo.-EDISI UKAS

Pemberita: Nur Nabilla
Gambar: Ibanez Jeffery Guang