Kaunsil Adat Istiadat Ransing Nempa Adat Asal Nyadi Moden
KUCHING: Pengawa nempa adat asal di Sarawak nyadi moden disungkakka agi nengah chara lebih sistematik nyengkaum mansik, nyerenih sereta nengkebang atur baru ngambika semampai engkeman dikena maya hari tu.
Menteri ba Opis Premier Sarawak, Dato Sri John Sikie Tayai madah, aum Kaunsil Adat Istiadat Sarawak ke diatur berengkah 4 ngagai 6 Mei tu tadi nyadi pelasar dikena berandauka isu bekaul adat nyengkaum chara nyerenih sereta mansik baru adat pupu raban bansa di nengeri tu.
Ku iya, pengawa nya diatur ngambika adat semampai dijaga kelimpah nentuka adat meruan ulih dikena seririh ubah rama enggau guna maya hari tu.
"Kaunsil tu patut nyadi pelasar negika adat nengah chara nyaga, ngemansang sereta ngerembaika adat asal di Sarawak," ku iya.
Iya bejaku munyi nya Maya Pengerami Selamat Kaunsil Adat Istiadat Sarawak ditu, Hari Tiga.
Kelimpah ari nya, iya mega madah, pengawa nyiri Kaban Kaunsil nya ungkup timpuh tiga taun berengkah 1 Mac 2026 nyentuk 24 Februari 2029 udah dikemendarka Kaunsil Aum Nengeri (MNPG) kena 16 April tu tadi nitihka atur Ordinan Kaunsil Adat Istiadat Sarawak 1977.
Iya enggau nya meri terima kasih ngagai Datu Ronnie Edward ke udah nyadi Tuai Kaunsil nya lalu deka abis timpuh kena 3 Jun tu ila.
"Sekumbang iya megai penuduk nya, macham inisiatif udah diatur nyengkaum kodifikasi enggau mansik baru adat, ke diatu ba renggat kepenudi," pia ku iya.
Iya madah, sekeda ari adat ke diatu ba renggat kepenudi nya nyengkaum Adat Iban 1993 enggau Adat Bidayuh 1994, kelimpah pansik baru Adat Kayan enggau Kenyah ke udah disetuju dikenataika ngagai Opis Luyar Besai Nengeri Sarawak ungkup pengawa nangkan nya.
Ba pengawa ngenegapka agi tanggungpengawa kaunsil, siti seksyen baru iya nya Seksyen Budaya enggau Tradisi bela ditumbuh dikena nambahka agi penemu senentang adat, budaya enggau sejarah pupu bansa di Sarawak.
Kelimpah ari nya, perintah nengeri bela ngemendarka pengawa nambah elawin enggau perengkaguna ngagai Kaban Kaunsil.
Tu nyengkaum elaun ninting bulan ditambah ari RM500 nyadi RM1,000 kelimpah elaun miting enggau pemeri bukai baka perubat enggau ngepan rasmi.-EDISI UKAS
